విద్యార్థుల పోరాటానికి సలాం.. నీట్ వివాదంపై గళమెత్తిన దర్శకుడు శేఖర్ కమ్ముల

నీట్ పరీక్షలో చోటుచేసుకున్న అవకతవకలపై దేశవ్యాప్తంగా విద్యార్థులు చేపట్టిన నిరసనలకు ప్రముఖ సినీ దర్శకుడు శేఖర్ కమ్ముల తన సంపూర్ణ మద్దతు ప్రకటించారు. కేంద్ర విద్యాశాఖ మంత్రి ధర్మేంద్ర ప్రధాన్ పదవికి రాజీనామా చేయాలన్న విద్యార్థుల డిమాండ్‌ను ఆయన సమర్థించారు. ఈ మేరకు శుక్రవారం ఆయన సామాజిక మాధ్యమం ఫేస్‌బుక్‌ వేదికగా ఒక పోస్ట్ చేశారు.

ఈ సందర్భంగా శేఖర్ కమ్ముల విద్యార్థుల మూడు ప్రధాన డిమాండ్లను ప్రస్తావించారు. మొదటిది, ఈ వైఫల్యానికి నైతిక బాధ్యత వహిస్తూ కేంద్ర మంత్రి రాజీనామా చేయడం. రెండవది, ఈ వివాదం కారణంగా ఆత్మహత్య చేసుకున్న విద్యార్థుల కుటుంబాలకు తగిన నష్టపరిహారం అందించి ఆదుకోవడం. మూడవది, భవిష్యత్తులో ఇలాంటి పేపర్ లీక్‌లు పునరావృతం కాకుండా స్పష్టమైన హామీ ఇవ్వడం. ఏ ప్రభుత్వమైనా పౌరులు అడగకముందే నెరవేర్చాల్సిన కనీస బాధ్యతలు ఇవని ఆయన పేర్కొన్నారు.

లాఠీఛార్జ్‌లు, ఆకలి వంటి ఇబ్బందులను సైతం లెక్కచేయకుండా పోరాడుతున్న విద్యార్థుల సంకల్పాన్ని ఆయన ప్రశంసించారు. "మన పిల్లలు జవాబుదారీతనాన్ని కోరుతున్నారు. వారి డిమాండ్‌లో పూర్తి న్యాయం ఉంది. ప్రభుత్వం వారి మాట విని, తగిన భరోసా ఇవ్వాలి" అని ఆయన రాసుకొచ్చారు. "డియర్ జెన్-జెడ్, మీరు చేస్తున్న పోరాటానికి శిరస్సు వంచి నమస్కరిస్తున్నాను. మీకు నా సలాం" అంటూ యువత పోరాట స్ఫూర్తిని అభినందించారు.

మన పిల్లలు గెలిస్తే దేశం గెలిచినట్లేనని, మన పిల్లలు గెలిస్తేనే మనం మనుగడకు సార్థకత అని ఆయన పేర్కొన్నారు. ప్రజలు గెలిచినప్పుడే ప్రభుత్వాలు నిజమైన విజయం సాధించినట్లు భావించాలని ఆయన అభిప్రాయపడ్డారు.