వారు శ్రీకాకుళం పరువు తీశారు: మంత్రి అచ్చెన్నాయుడు

మాజీ స్పీకర్ తమ్మినేని సీతారాం అక్రమాలు ఇంకా చాలా ఉన్నాయని, వాటన్నిటిపై సమగ్ర విచారణకు ఆదేశాలు జారీ చేశామని ఆంధ్రప్రదేశ్ రాష్ట్ర వ్యవసాయ శాఖ మంత్రి కింజరాపు అచ్చెన్నాయుడు వెల్లడించారు. పార్టీ కేంద్ర కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడుతూ, శ్రీకాకుళం జిల్లాకు చెందిన ఇద్దరు మాజీ నేతల అరాచకాల వల్ల జిల్లా ప్రతిష్ట మసకబారిందని ఆవేదన వ్యక్తం చేశారు.

జిల్లా నుంచి మంత్రిగా, సభాపతిగా కీలక బాధ్యతలు నిర్వహించిన వారు చేసిన దారుణాలు చూసి నివ్వెరపోవాల్సి వస్తోందని పేర్కొన్నారు. బతికి ఉన్న వ్యక్తిని చనిపోయినట్లుగా చిత్రీకరించి భూములు కాజేయడం సిగ్గుచేటని, అటువంటి దుశ్చర్యలకు పాల్పడితే తాను ఆత్మహత్య చేసుకునేవాడినని అచ్చెన్నాయుడు వ్యాఖ్యానించారు. అసెంబ్లీ స్పీకర్‌గా విలువలతో కూడిన ఉపన్యాసాలు ఇచ్చి, తెరవెనుక ఇలాంటి అక్రమాలకు ఎలా పాల్పడతారని ప్రశ్నించారు. తప్పు చేసిన వారికి, వారిని సమర్థించే వారికి నైతికత లేదని, వైఎస్సార్ కాంగ్రెస్ పార్టీ నాయకుల తీరు అలాగే తయారైందని విమర్శించారు.

గతంలో తనపై పెట్టినవన్నీ తప్పుడు కేసులు కాబట్టే తాను ధైర్యంగా ఉన్నానని, అక్రమాలకు పాల్పడిన వారిని చట్టపరంగా శిక్షించడమే కూటమి ప్రభుత్వ లక్ష్యమని ఆయన స్పష్టం చేశారు. రాజకీయ కక్ష సాధింపు చర్యలతో ఆగమేఘాల మీద అరెస్టులు చేసే సంస్కృతి తమ ప్రభుత్వానిది కాదని తేల్చి చెప్పారు.

రైతుల సమస్యలపై జగన్ నాటకాలు

గత ఐదేళ్లలో రాష్ట్రంలో వ్యవసాయ రంగాన్ని జగన్మోహన్ రెడ్డి పూర్తిగా నిర్వీర్యం చేశారని అచ్చెన్నాయుడు ధ్వజమెత్తారు. పొగాకు, ఆక్వా రైతుల సమస్యలకు కేంద్రం నుంచి త్వరలోనే పరిష్కారం లభిస్తుందన్న ఆశాభావం వ్యక్తం చేశారు. పొగాకు కొనుగోళ్లలో తలెత్తిన సమస్యపై ముఖ్యమంత్రి చంద్రబాబు నాయుడు తక్షణమే స్పందించి కేంద్ర ప్రభుత్వాన్ని అప్రమత్తం చేశారని, ఢిల్లీలో జరిపిన చర్చలు సఫలమయ్యాయని వివరించారు. ఆక్వా ఫీడ్ ధరల తగ్గింపు విషయంలోనూ కేంద్ర మంత్రులు సానుకూలంగా స్పందించారని తెలిపారు. ఈ సానుకూల పరిణామాలను జీర్ణించుకోలేక, జగన్ తన పార్టీ కార్యకర్తలకు రైతు కండువాలు కప్పి కొత్త నాటకాలకు తెరలేపారని ఎద్దేవా చేశారు.

పొగాకు, ఆక్వా రైతుల సమస్యలకు కేంద్రం నుంచి త్వరలోనే పరిష్కారం

రాష్ట్రం వ్యవసాయ రంగాన్ని దెబ్బతీసిన చేసిన వ్యక్తి జగన్‌మోహన్ రెడ్డి అని అచ్చెన్నాయుడు మండిపడ్డారు. రైతుల సమస్యలను కూటమి ప్రభుత్వం చిత్తశుద్ధితో పరిష్కరిస్తున్నట్లు పేర్కొన్నారు. పొగాకు రైతులతో జగన్ జరిపిన సమావేశం హాస్యాస్పదంగా ఉందని అన్నారు. కేంద్ర మంత్రులు పొగాకు కొనుగోళ్లు, ఆక్వా ఫీడ్ ధరల తగ్గింపు అంశాలపై సానుకూలంగా స్పందించినట్లు తెలిపారు. వైసీపీ కార్యకర్తలకు రైతు కండువాలు వేసి జగన్ డ్రామాలు ఆడుతున్నారని ఆరోపించారు.