పసిడి, వెండి ధరలకు రెక్కలు.. భారీగా పెరిగిన రేట్లు

ఇవాళ‌ దేశీయ బులియన్ మార్కెట్‌లో బంగారం, వెండి ధరలు భారీగా పెరిగాయి. అంతర్జాతీయ మార్కెట్లలో సానుకూల సంకేతాలు, ముడి చమురు ధరలు తగ్గడం, ప‌శ్చిమాసియాలో కొనసాగుతున్న భౌగోళిక రాజకీయ ఉద్రిక్తతలు వంటి కారణాలతో సురక్షిత పెట్టుబడి సాధనంగా పసిడికి డిమాండ్ పెరిగింది. దీంతో ధరలు ఒక్కసారిగా పరుగులు పెట్టాయి.

మల్టీ కమొడిటీ ఎక్స్ఛేంజ్ (ఎంసీఎక్స్‌)లో ఇవాళ‌ ఉదయం 11:20 గంటల సమయంలో ఆగస్ట్ డెలివరీ గోల్డ్ ఫ్యూచర్స్ ధర రూ.1,460 పెరిగి 10 గ్రాములకు రూ.1,42,848 వద్ద ఇంట్రాడే గరిష్ఠ స్థాయికి చేరుకుంది. అదేవిధంగా సెప్టెంబర్ డెలివరీ సిల్వర్ ఫ్యూచర్స్ ధర రూ.3,380 పెరిగి కిలోకు రూ.2,21,780 గరిష్ఠాన్ని తాకింది. ట్రేడింగ్ ప్రారంభంలో 10 గ్రాముల బంగారం ధర రూ.1,42,386, కిలో వెండి ధర రూ.2,19,200గా నమోదైంది.

దిగివచ్చిన క్రూడాయిల్ ధరలు..  
అంతర్జాతీయంగా బ్రెంట్ క్రూడ్ ఆయిల్ ధర బ్యారెల్‌కు 90 డాలర్ల దిగువకు పడిపోవడం దేశీయ బులియన్ మార్కెట్‌పై ప్రభావం చూపింది. ప‌శ్చిమాసియాలో ఉద్రిక్తతలను తగ్గించేందుకు దౌత్యపరమైన ప్రయత్నాలు జరుగుతున్నాయనే నివేదికలు, ఇరాన్‌పై అమెరికా తన వైమానిక దాడులను నిలిపివేసిందని వచ్చిన వార్తలు ముడి చమురు ధరల తగ్గుదలకు కారణమయ్యాయి.

గతంలో ముడి చమురు ధరలు పెరిగినప్పుడు ప్రపంచవ్యాప్తంగా ద్రవ్యోల్బణం పెరిగి, అమెరికా ఫెడరల్ రిజర్వ్ వంటి కేంద్ర బ్యాంకులు వడ్డీ రేట్లను పెంచుతాయనే ఆందోళనలు వ్యక్తమయ్యాయి. అయితే, మార్కెట్ నిపుణుల ప్రకారం ప్రస్తుతం కొనసాగుతున్న భౌగోళిక రాజకీయ అనిశ్చితి, బలమైన డాలర్ ఒత్తిడిని అధిగమించి సురక్షిత పెట్టుబడిగా బంగారానికి మద్దతునిస్తోంది. ఈ కారణంగానే పెట్టుబడిదారులు బంగారం వైపు మొగ్గు చూపుతున్నారని వారు విశ్లేషిస్తున్నారు.