వైభవ్ సూర్యవంశీపై ఎఫ్1 రేసర్ ప్రశంసలు

ఫార్ములా వన్ (F1) రేసింగ్ బుల్స్ డ్రైవర్ ఆర్విద్ లిండ్‌బ్లాడ్, భారత యువ క్రికెట్ సంచలనం వైభవ్ సూర్యవంశీపై ప్రశంసలు కురిపించాడు. మెరుగైన సాంకేతికత, చిన్న వయసులోనే సమాచారం అందుబాటులో ఉండటం వల్లే నేటి తరం అథ్లెట్లు క్రీడల్లో వేగంగా రాణిస్తున్నారని, వైభవ్ దీనికి చక్కటి ఉదాహరణ అని ఆయన అభిప్రాయపడ్డాడు. ఇంగ్లండ్‌, భారత్ మధ్య జరిగిన మొదటి వన్డే సందర్భంగా ఈ ఆసక్తికర వ్యాఖ్యలు చేశాడు.

భారత సంతతికి చెందిన ఆర్విద్ మాట్లాడుతూ.. "ఈ మార్పు అన్ని క్రీడల్లోనూ కనిపిస్తోంది. టెక్నాలజీ మెరుగుపడటంతో చిన్న వయసులోనే మెరుగైన సమాచారం, శిక్షణ అందుబాటులోకి వస్తున్నాయి. అందుకే యువకులు అద్భుతంగా రాణిస్తున్నారు. క్రికెట్‌లోనూ 15 ఏళ్లకే వైభవ్ సూర్యవంశీ అద్భుతంగా ఆడుతున్నాడు. ఇది క్రీడల్లో వస్తున్న సహజమైన మార్పు" అని వివరించాడు.

ఇదే సమయంలో తన భారతీయ మూలాల గురించి కూడా ఆర్విద్ పంచుకున్నాడు. "మా నానమ్మ, తాతయ్య పంజాబీలు. నా భారతీయ మూలాలతో నాకు బలమైన అనుబంధం ఉంది. మా నానమ్మ చేసే భారతీయ వంటకాలంటే నాకు చాలా ఇష్టం" అని చెప్పాడు. గతేడాది ముంబైలోని ఆజాద్ మైదాన్‌లో పిల్లలతో కలిసి క్రికెట్ ఆడిన అనుభవాన్ని గుర్తుచేసుకున్నాడు. ఇటీవల బ్రిటిష్ గ్రాండ్ ప్రీలో భారత కెప్టెన్ శుభ్‌మన్ గిల్‌ను కలిశానని, ఇద్దరి కుటుంబ మూలాలు పంజాబ్‌కు చెందినవే కావడం సంతోషంగా ఉందని తెలిపాడు.

ప్రపంచంలోనే అత్యంత వేగవంతమైన కార్లను నడిపినా, తనకు ఇంకా పబ్లిక్ రోడ్ డ్రైవింగ్ లైసెన్స్ రాలేదని ఆర్విద్ నవ్వుతూ చెప్పాడు. "నిన్ననే నా మొదటి రోడ్ డ్రైవింగ్ పాఠం తీసుకున్నా. ఇది కాస్త సిల్లీగా అనిపిస్తోంది, త్వరలోనే లైసెన్స్ పొందాలి" అని సరదాగా వ్యాఖ్యానించాడు.