ఫిఫా వరల్డ్ కప్‌లో ఎంబాపె విశ్వరూపం.. చరిత్రాత్మక రికార్డులతో సరికొత్త చరిత్ర!

ఫ్రాన్స్ స్టార్ ఫుట్‌బాల్ ఆటగాడు కిలియన్ ఎంబాపె ప్రపంచ ఫుట్‌బాల్ చరిత్రలో తన పేరును సువర్ణాక్షరాలతో లిఖించుకున్నాడు. ఫిఫా వరల్డ్ కప్ 2026లో భాగంగా బోస్టన్ స్టేడియంలో మొరాకోతో జరిగిన క్వార్టర్ ఫైనల్ మ్యాచ్‌లో ఎంబాపె చరిత్రాత్మక మైలురాళ్లను అందుకున్నాడు. అత్యంత పిన్న వయసులోనే (27 ఏళ్లు) 20 వరల్డ్ కప్ మ్యాచ్‌లు ఆడిన ఆటగాడిగా నిలవడంతో పాటు, అత్యంత వేగంగా 20 వరల్డ్ కప్ గోల్స్ చేసిన క్రీడాకారుడిగా ప్రపంచ రికార్డు సృష్టించాడు. అతడి అద్భుత ప్రదర్శనతో ఫ్రాన్స్ 2-0 తేడాతో మొరాకోను ఓడించి వరల్డ్ కప్‌లో వరుసగా మూడోసారి సెమీఫైనల్‌కు దూసుకెళ్లింది.

ఈ మ్యాచ్ మొదటి అర్ధభాగంలో లభించిన పెనాల్టీని ఎంబాపె మిస్ చేసినప్పటికీ, పట్టువదలకుండా 60వ నిమిషంలో ఒక మెరుపు గోల్ చేశాడు. ఆ తర్వాత తన సహచర ఆటగాడు ఉస్మాన్ డెంబెలేకు మరో గోల్ చేయడానికి అద్భుతమైన పాస్ అందించాడు. ప్రస్తుతం జరుగుతున్న టోర్నమెంట్‌లో ఎంబాపెకి ఇది 8వ గోల్. దీనితో మూడు వరల్డ్ కప్ ఎడిషన్లలో (2018, 2022, 2026) కలిపి అతడి మొత్తం గోల్స్ సంఖ్య 20కి చేరింది. వరల్డ్ కప్ చరిత్రలో అత్యధిక గోల్స్ చేసిన అర్జెంటీనా స్టార్ లియోనెల్ మెస్సి (21 గోల్స్) రికార్డును సమం చేయడానికి ఎంబాపె కేవలం ఒక్క గోల్ దూరంలో ఉన్నాడు.

ఈ మ్యాచ్‌తో ఫ్రాన్స్ తరఫున అత్యధిక వరల్డ్ కప్ మ్యాచ్‌లు (20) ఆడిన ప్లేయర్‌గా హ్యూగో లోరిస్ రికార్డును ఎంబాపె సమం చేశాడు. అలాగే వరల్డ్ కప్‌లో అత్యధిక విజయాలు (17) అందుకున్న ఆటగాడిగా జర్మనీ దిగ్గజం మిరోస్లావ్ క్లోజ్ రికార్డును కూడా అందుకున్నాడు. ఈ జాబితాలో లియోనెల్ మెస్సి (20 విజయాలు) మాత్రమే అతడి కంటే ముందున్నాడు. ఇది కాకుండా, వరల్డ్ కప్ నాకౌట్ దశలో అత్యధిక గోల్స్ చేసిన ఆటగాడిగా బ్రెజిల్ దిగ్గజం రొనాల్డో రికార్డును ఇదివరకే అధిగమించిన ఎంబాపె.. మొరాకోపై చేసిన గోల్‌తో ఆ సంఖ్యను 12కు పెంచుకుని అగ్రస్థానంలో కొనసాగుతున్నాడు. కెరీర్ అత్యుత్తమ ఫామ్‌లో ఉన్న ఎంబాపె సెమీఫైనల్లోనూ ఇదే జోరు కొనసాగించాలని ఫ్రాన్స్ అభిమానులు ఆశిస్తున్నారు.