బొజ్జను తేలిగ్గా తీసుకుంటున్నారా? క్యాన్సర్‌కు ఇదే పెద్ద హెచ్చరిక!

పొట్ట చుట్టూ కొవ్వు పెరిగిందా? అది కేవలం అందం సమస్య అనుకుంటే పొరపాటే. శరీరంలో నిశ్శబ్దంగా పెరుగుతున్న ప్రమాదానికి అది సంకేతం కావొచ్చు. కొన్ని రకాల క్యాన్సర్‌లతో కూడా దీనికి సంబంధం ఉందని వైద్య నిపుణులు చెబుతున్నారు.

లోపలి కొవ్వే అసలు ముప్పు
శరీరంలో ఉండే కొవ్వు అంతా ఒకేలా ఉండదు. కాలేయం, క్లోమ గ్రంథి, పేగుల చుట్టూ పేరుకునే కొవ్వును విసెరల్‌ ఫ్యాట్‌ అంటారు. ఇది చర్మం కింద ఉండే కొవ్వుతో పోలిస్తే చాలా చురుగ్గా పనిచేస్తుంది. శరీరంలో ఇన్‌ఫ్లమేషన్‌ను పెంచే పదార్థాలు, హార్మోన్లను విడుదల చేస్తుంది. ఇవి కణాల సాధారణ పనితీరుపై ప్రభావం చూపుతాయి.

క్యాన్సర్‌తో ఎలా సంబంధం?
పొట్ట చుట్టూ పేరుకునే కొవ్వు నేరుగా క్యాన్సర్‌కు కారణం కాదు. కానీ శరీరంలో ఇన్‌ఫ్లమేషన్‌, హార్మోన్ల అసమతుల్యత, ఇన్సులిన్‌ నిరోధకత పెరగడానికి దోహదపడుతుంది. ఈ పరిస్థితుల్లో దెబ్బతిన్న కణాలు నాశనం కాకుండా పెరిగే అవకాశం ఎక్కువగా ఉంటుంది. అదే క్యాన్సర్‌ ప్రమాదాన్ని పెంచుతుంది.

ఈ క్యాన్సర్ల ముప్పు ఎక్కువ
పరిశోధనల ప్రకారం పొట్ట చుట్టూ అధిక కొవ్వు ఉంటే పెద్దపేగు, కాలేయం, క్లోమ గ్రంథి, కిడ్నీ, అన్నవాహిక, గర్భాశయం, మెనోపాజ్‌ తర్వాత వచ్చే రొమ్ము క్యాన్సర్‌, ప్రోస్టేట్‌ క్యాన్సర్‌ ముప్పు పెరగవచ్చు. అధిక బరువు కనీసం 13 రకాల క్యాన్సర్లతో సంబంధం ఉందని అంతర్జాతీయ క్యాన్సర్‌ పరిశోధన సంస్థ వెల్లడించింది. ప్రపంచ ఆరోగ్య సంస్థ కూడా ఊబకాయాన్ని క్యాన్సర్‌కు దారితీసే ప్రధాన కారణాల్లో ఒకటిగా గుర్తించింది.

ఇతర ఆరోగ్య సమస్యలూ వెంటనే
విసెరల్‌ ఫ్యాట్‌ ఒక్కటే సమస్యగా ఉండదు. దీనితో పాటు మధుమేహం, అధిక రక్తపోటు, ఫ్యాటీ లివర్‌, చెడు కొలెస్ట్రాల్‌, మెటబాలిక్‌ సిండ్రోమ్‌ వంటి సమస్యలు కూడా కనిపించే అవకాశం ఉంది. ఇవన్నీ కలిపి శరీరంపై మరింత ఒత్తిడి పెంచుతాయి.

బరువు సాధారణంగానే ఉన్నా జాగ్రత్త
బరువు సాధారణంగా ఉందని నిర్లక్ష్యం చేయొద్దని నిపుణులు చెబుతున్నారు. రోజంతా కూర్చునే అలవాటు, అనారోగ్యకర ఆహారం, కండరాలు తగ్గిపోవడం వల్ల కూడా లోపలి కొవ్వు పెరగొచ్చు. అందుకే నడుము కొలత కూడా ఆరోగ్యానికి కీలక సూచికగా భావిస్తున్నారు.

ఈ లక్షణాలు ఉంటే అప్రమత్తం
శరీర బరువు మారకపోయినా నడుము కొలత పెరగడం, కొవ్వు ఎక్కువగా పొట్ట చుట్టూనే చేరడం, మధుమేహం లేదా ప్రీడయాబెటిస్‌ ఉండటం, పరీక్షల్లో ఫ్యాటీ లివర్‌ బయటపడటం, అధిక రక్తపోటు లేదా కొలెస్ట్రాల్‌ సమస్యలు కనిపించడం, కుటుంబంలో ఊబకాయంతో సంబంధం ఉన్న క్యాన్సర్‌ చరిత్ర ఉండటం వంటి అంశాలను నిర్లక్ష్యం చేయొద్దు. ఇవి క్యాన్సర్‌ను నిర్ధారించవు. కానీ వైద్య పరీక్షలు చేయించుకోవాల్సిన అవసరాన్ని గుర్తు చేస్తాయి.

జీవనశైలే కీలకం
పొట్ట చుట్టూ కొవ్వు తగ్గించడం సాధ్యమేనని వైద్యులు చెబుతున్నారు. కొద్దిగా బరువు తగ్గినా ఇన్సులిన్‌ పనితీరు మెరుగుపడుతుంది. శరీరంలో ఇన్‌ఫ్లమేషన్‌ తగ్గుతుంది. మెటబాలిక్‌ సమస్యలు కూడా నియంత్రణలోకి వస్తాయి. వేగంగా బరువు తగ్గడం కంటే దీర్ఘకాలం పాటించే ఆరోగ్యకర జీవనశైలిపై దృష్టి పెట్టాలని సూచిస్తున్నారు.

ఇలా చేస్తే ముప్పు తగ్గుతుంది
రోజూ వ్యాయామం చేయడం, కార్డియోతో పాటు కండరాల బలం పెంచే వ్యాయామాలు చేయడం మంచిది. కూరగాయలు, పండ్లు, తృణధాన్యాలు, పప్పులు, తగిన ప్రొటీన్‌తో కూడిన ఆహారం తీసుకోవాలి. ప్రాసెస్డ్‌ ఫుడ్‌, శుద్ధి చేసిన కార్బోహైడ్రేట్లు, చక్కెర పానీయాలు తగ్గించాలి. తగిన నిద్ర, ఒత్తిడి నియంత్రణపై దృష్టి పెట్టాలి. పొగాకు, మద్యం అలవాట్లకు దూరంగా ఉండాలి. ఊబకాయం, మధుమేహం, కుటుంబంలో క్యాన్సర్‌ చరిత్ర ఉన్నవారు క్రమం తప్పకుండా ఆరోగ్య పరీక్షలు చేయించుకోవాలి.