టెక్నాలజీతో టెన్షన్.. స్పిరిచ్యువాలిటీతోనే శాంతి: సీఎం చంద్రబాబు

సాంకేతికత (టెక్నాలజీ) మనకు పురోగతిని అందిస్తుండవచ్చు కానీ, దాంతో పాటు తీవ్రమైన ఒత్తిడిని కూడా మోసుకొస్తోందని, ఆ టెన్షన్‌ను జయించడానికి ఏకైక మార్గం ఆధ్యాత్మికతేనని ఆంధ్రప్రదేశ్ ముఖ్యమంత్రి చంద్రబాబు స్పష్టం చేశారు. అభివృద్ధి, సంక్షేమం ఎంత ముఖ్యమో, మన సంస్కృతీ సంప్రదాయాలను, వేల ఏళ్ల వారసత్వాన్ని కాపాడుకోవడం కూడా అంతే కీలకమని ఆయన ఉద్ఘాటించారు. విజయవాడలో దసరా శరన్నవరాత్రుల సందర్భంగా అత్యంత వైభవంగా నిర్వహించిన "విజయవాడ ఉత్సవ్ 2.0" ముగింపు వేడుకలకు ఆయన ముఖ్య అతిథిగా హాజరై ప్రసంగించారు.

ఈ సందర్భంగా చంద్రబాబు మాట్లాడుతూ, "విజయవాడ ఉత్సవాన్ని రెండోసారి దేశం, ప్రపంచం గుర్తుంచుకునేలా నిర్వహించారు. ఇందుకు కారణమైన నిర్వాహకులను, విజయవాడ ప్రజలను పేరుపేరునా అభినందిస్తున్నాను. మీ అందరినీ చూస్తుంటే చాలా ఆనందంగా ఉంది. విజయవాడ ఉత్సవం 3.0 ప్రపంచమే మనవైపు తిరిగి చూసేలా నిర్వహించాలని మనస్ఫూర్తిగా ఆకాంక్షిస్తున్నాను. ఈ విజయానికి దుర్గమ్మ తల్లి ఆశీస్సులే కారణం" అని అన్నారు.

మన కళలు, సంస్కృతి, సంప్రదాయాలు, ఆచారాలను చాటిచెప్పేలా ఈ ఉత్సవాలను నిర్వహించడం అభినందనీయమన్నారు. సంగీతం, నృత్యం, జానపద కళలు, సాంస్కృతిక ప్రదర్శనలతో దసరా ఉత్సవాల్లో కొత్త ఉత్సాహాన్ని నింపారని కొనియాడారు. ఈ ఉత్సవాలతో పాటు ‘సరస్ సదస్సు’ను కూడా ఇక్కడే నిర్వహించడం విజయవాడకు ఒక ప్రత్యేకమైన శోభను తెచ్చిపెట్టిందని ఆయన పేర్కొన్నారు.

టెక్నాలజీ-ఆధ్యాత్మికత సమతుల్యతే కీలకం

తన ప్రసంగంలో టెక్నాలజీ, ఆధ్యాత్మికత ప్రాధాన్యతను చంద్రబాబు ప్రత్యేకంగా వివరించారు. "నేను ఎప్పుడూ టెక్నాలజీ గురించి మాట్లాడతాను. కానీ, టెక్నాలజీ వల్ల టెన్షన్ వస్తుంది. ఆ టెన్షన్ పోవాలంటే ఏకైక మందు స్పిరిచ్యువాలిటీ. ప్రపంచాన్ని జయించే టెక్నాలజీ మనకు సొంతం కావచ్చు, కానీ ఆధ్యాత్మికతతో మన మనసును మనం జయించుకునే అవకాశం లభిస్తుంది. మానసిక ఒత్తిడిని తగ్గించి, మానసిక ఉల్లాసాన్ని పెంచడానికి ఇలాంటి ఉత్సవాలు చాలా అవసరం" అని సీఎం వివరించారు. ఆధునిక జీవితంలో ఉరుకులు పరుగుల మధ్య, గంటల తరబడి సోషల్ మీడియా రీల్స్ చూస్తూ గడుపుతున్న నేటి తరానికి ఇలాంటి సాంస్కృతిక కార్యక్రమాలు గొప్ప ఉపశమనాన్ని ఇస్తాయని ఆయన అభిప్రాయపడ్డారు.

గతానికి, ఇప్పటికీ తేడా ఇదే

గత ప్రభుత్వ హయాంలోని పరిస్థితులను, ప్రస్తుత వాతావరణాన్ని చంద్రబాబు పోల్చిచూపారు. "రెండేళ్ల కిందట రాష్ట్రంలో ఉత్సవాలే లేవు. ఎటుచూసినా భయం, అశాంతి, ఎన్నో ఇబ్బందులు ఉండేవి. కానీ ఈరోజు ప్రజలు స్వేచ్ఛగా, ఆనందంగా పండుగలు చేసుకుంటున్నారు. ఇదే మార్పు," అని ఆయన అన్నారు. మహిళలకు ఉచిత బస్సు ప్రయాణ సౌకర్యం కల్పించడం వల్ల రాష్ట్రవ్యాప్తంగా దేవాలయాలకు వెళ్లే మహిళల సంఖ్య గణనీయంగా పెరిగిందని, ఇది తనకు ఎంతో గర్వకారణమని తెలిపారు.

ఆరోగ్యకర, సంపన్న, సంతోషకర సమాజమే లక్ష్యం

ప్రభుత్వం సంక్షేమ కార్యక్రమాలు, అభివృద్ధి పనులు, యువతకు ఉపాధి కల్పనతో పాటు సుపరిపాలన ద్వారా ప్రజల పనులను సులభతరం చేస్తోందని చంద్రబాబు తెలిపారు. "పేదరికం లేని సమాజ నిర్మాణం కోసం ఆశీస్సులు ఇవ్వాలని దుర్గమ్మ తల్లిని కోరాను. ఈ రాష్ట్రంలో ఆరోగ్యకరమైన, సంపన్న, సంతోషకర సమాజం (హెల్తీ, వెల్తీ, హ్యాపీ సొసైటీ) ఉండాలన్నదే నా ఆకాంక్ష. అందరూ ఆనందంగా, ఆరోగ్యంగా, ఆర్థికంగా బలంగా ఉండాలి. ఇటీవలే విజయవాడలో కొన్ని వేల మంది సమస్యలను ఒకేసారి పరిష్కరించాం" అని ఆయన గుర్తుచేశారు.

రాష్ట్రంలోని అన్ని పుణ్యక్షేత్రాల్లో ఇలాంటి ఉత్సవాలు నిర్వహించడం ద్వారా ప్రజలకు ఎంతో మేలు జరుగుతుందని, పర్యాటకం కూడా అభివృద్ధి చెందుతుందని సీఎం ఆశాభావం వ్యక్తం చేశారు. మన కళలను, సాంప్రదాయాలను, ఆధ్యాత్మిక వైభవాన్ని ప్రపంచానికి చాటిచెప్పేందుకు ముందుకువచ్చే సంస్థలకు రాష్ట్ర ప్రభుత్వం ఎల్లప్పుడూ అండగా ఉంటుందని హామీ ఇచ్చారు. విజయవాడ పేరు ప్రపంచంలో మార్మోగే విధంగా ఉత్సవాలను నిర్వహించిన నగరవాసులను "శభాష్ విజయవాడ" అంటూ ప్రత్యేకంగా అభినందించారు. ఈ కార్యక్రమం ఎంత ప్రభావం చూపిందంటే, ఇద్దరు ముఖ్యమంత్రులు, కేంద్ర మంత్రులతో పాటు సాక్షాత్తు దేశ అధ్యక్షురాలు కూడా ఇక్కడికి వచ్చే ఆసక్తి చూపారని, ఇది విజయవాడ స్థల మహత్యమని ఆయన కొనియాడారు.