ఎన్టీఆర్-త్రివిక్రమ్ భారీ ప్రాజెక్ట్... దైవిక నేపథ్యంతో దృశ్య కావ్యం!
- ఎన్టీఆర్, త్రివిక్రమ్ కలయికలో మరో భారీ చిత్రం
- దైవిక నేపథ్యంతో రానున్న సినిమా అని వెల్లడి
- అనిరుధ్ రవిచందర్ సంగీత సారథ్యం
- హారిక అండ్ హాసిని, ఎన్టీఆర్ ఆర్ట్స్ సంయుక్త నిర్మాణం
- అరవింద సమేత తర్వాత మళ్లీ చేతులు కలిపిన బ్లాక్బస్టర్ ద్వయం
గతంలో వీరిద్దరి కాంబినేషన్లో వచ్చిన 'అరవింద సమేత వీర రాఘవ' చిత్రం బాక్సాఫీస్ వద్ద ఘన విజయం సాధించడమే కాకుండా, విమర్శకుల ప్రశంసలు కూడా పొందింది. ఆ సినిమా తర్వాత మళ్లీ ఈ విజయవంతమైన ద్వయం చేతులు కలపడంతో సినిమాపై అంచనాలు తారాస్థాయికి చేరాయి. ఈసారి సరికొత్త కథాంశంతో, మునుపెన్నడూ చూడని రీతిలో ఈ చిత్రం ఉండబోతోందని తెలుస్తోంది.
దైవిక నేపథ్యంతో ఈ సినిమా రూపుదిద్దుకోనుందని చిత్ర వర్గాలు వెల్లడించాయి. కుమారస్వామి ఇతివృత్తంతో... పురాణాల స్ఫూర్తితో కూడిన కథ, లోతైన భావోద్వేగాలు, ఉత్కంఠభరితమైన యుద్ధ సన్నివేశాలు, సరికొత్త ప్రపంచాన్ని ఆవిష్కరించేలా ఈ దృశ్యకావ్యం ఉండబోతోందని సమాచారం. ఎన్టీఆర్ నటన, త్రివిక్రమ్ సంభాషణలు ఈ దైవిక కథకు మరింత బలాన్ని చేకూర్చనున్నాయని అభిమానులు భావిస్తున్నారు.
ఈ భారీ చిత్రానికి సాంకేతిక బృందం కూడా అదే స్థాయిలో ఉండనుంది. సంగీత సంచలనం అనిరుధ్ రవిచందర్ ఈ సినిమాకు సంగీతం అందించనున్నారు. తన నేపథ్య సంగీతంతో సినిమాకు ప్రాణం పోసే అనిరుధ్, ఈ చిత్రానికి ప్రత్యేక ఆకర్షణగా నిలుస్తారని చిత్ర బృందం నమ్మకంగా ఉంది.
నిర్మాణ విలువల విషయంలో ఏమాత్రం రాజీ పడకుండా, ఈ భారీ చిత్రాన్ని హారిక అండ్ హాసిని క్రియేషన్స్, ఎన్టీఆర్ ఆర్ట్స్ పతాకాలపై ఎస్. రాధాకృష్ణ (చినబాబు), నందమూరి కల్యాణ్ రామ్ సంయుక్తంగా నిర్మిస్తున్నారు.
భారతీయ సినీ పరిశ్రమలో అత్యంత విజయవంతమైన కలయికల్లో ఒకటైన ఎన్టీఆర్-త్రివిక్రమ్ జోడీ, రెండు అగ్ర నిర్మాణ సంస్థలతో కలిసి వస్తుండటంతో ఈ చిత్రంపై దేశవ్యాప్తంగా ఆసక్తి నెలకొంది. త్వరలోనే ఈ చిత్రంలోని ఇతర నటీనటులు, సాంకేతిక నిపుణుల వివరాలను, చిత్రీకరణ షెడ్యూల్ను అధికారికంగా ప్రకటించనున్నారు.
