ప్రభుత్వ సేవలు సులభతరం.. ఫిర్యాదులకు 'మనమిత్ర': సీఎం చంద్రబాబు కీలక ఆదేశాలు

ప్రభుత్వ సేవలను ప్రజలకు మరింత చేరువ చేసేందుకు, పరిపాలనలో పారదర్శకత, వేగాన్ని పెంచేందుకు ముఖ్యమంత్రి చంద్రబాబు కీలక ఆదేశాలు జారీ చేశారు. ప్రభుత్వ పథకాలు, సేవలు పొందడంలో ప్రజలు ఎదుర్కొంటున్న ఇబ్బందులను తొలగించి, ప్రక్రియలను సులభతరం చేయాలని ఆయన స్పష్టం చేశారు. నేడు అమరావతి సచివాలయంలోని రియల్-టైమ్ గవర్నెన్స్ సొసైటీ (ఆర్టీజీఎస్) కేంద్రంలో వివిధ శాఖల పనితీరుపై ఆయన ఉన్నతస్థాయి సమీక్ష నిర్వహించారు. ఈ సందర్భంగా ప్రజలతో నిత్యం సంబంధాలుండే శాఖల్లో సేవల సరళీకరణపై ప్రధానంగా దృష్టి సారించారు.

ముందుగా 11 రకాల కీలక సేవల్లో అనవసరమైన ప్రక్రియలను కుదించి, వాటిని సులభతరం చేస్తున్నామని అధికారులు ముఖ్యమంత్రికి వివరించారు. దీనిపై సంతృప్తి వ్యక్తం చేసిన సీఎం, ప్రజా ఫిర్యాదుల స్వీకరణ వ్యవస్థను (పీజీఆర్ఎస్) మరింత పటిష్ఠం చేయాలని ఆదేశించారు. ప్రజలు తమ సమస్యలను సులభంగా ప్రభుత్వ దృష్టికి తీసుకువచ్చేలా ఆన్‌లైన్ పోర్టల్‌తో పాటు, ‘మనమిత్ర’ వాట్సాప్ ద్వారా ప్రత్యేక సేవలను ప్రారంభించాలని సూచించారు. కేవలం టెక్స్ట్ మెసేజ్‌లే కాకుండా, వాయిస్ మెసేజ్‌ల రూపంలో పంపే ఫిర్యాదులను కూడా స్వీకరించి, వాటి పరిష్కారానికి చర్యలు తీసుకోవాలని స్పష్టం చేశారు.

క్షేత్రస్థాయికి అధికారులు.. కనెక్టివిటీకి డెడ్‌లైన్
ప్రజల సమస్యలను క్షేత్రస్థాయిలో తెలుసుకుని, తక్షణమే పరిష్కరించేందుకు అధికారులు తప్పనిసరిగా క్షేత్రస్థాయి పర్యటనలు చేయాలని చంద్రబాబు ఆదేశించారు. ఇందుకు అనుగుణంగా సెక్రటరీలు నెలకు 3 రోజులు, శాఖాధిపతులు (హెచ్‌ఓడీలు) 6 రోజులు, జిల్లా కలెక్టర్లు 8 రోజులు క్షేత్రస్థాయిలో పర్యటించాలని స్పష్టం చేస్తూ సర్క్యులర్ జారీ చేసినట్లు అధికారులు సీఎంకు తెలిపారు. సమస్యలు అధికంగా ఉన్న ప్రాంతాలను గుర్తించి, వాటిపై ప్రత్యేక దృష్టి సారించాలని సీఎం సూచించారు.

రాష్ట్రంలో మెరుగైన కమ్యూనికేషన్ వ్యవస్థ ప్రాధాన్యతను నొక్కిచెప్పిన ముఖ్యమంత్రి, మొబైల్ నెట్‌వర్క్ సమస్యలను యుద్ధప్రాతిపదికన పరిష్కరించాలన్నారు. రాష్ట్రవ్యాప్తంగా సుమారు 3,000 ప్రాంతాల్లో సిగ్నల్ సమస్యలు ఉన్నట్లు గుర్తించామని, రాబోయే మూడు నెలల్లో నెట్‌వర్క్ సంస్థలతో మాట్లాడి ఈ సమస్యను అధిగమించాలని డెడ్‌లైన్ విధించారు.

‘నవచేతన’పై సమీక్ష.. ఆర్టీజీఎస్ పనితీరుకు ప్రశంసలు
స్త్రీ శిశు సంక్షేమ శాఖ ఆధ్వర్యంలో అమలవుతున్న 'నవచేతన' (ఎర్లీ చైల్డ్ హుడ్ డెవలప్‌మెంట్ స్క్రీనింగ్) కార్యక్రమంపై అధికారులు ప్రజెంటేషన్ ఇచ్చారు. పిల్లల శారీరక, మానసిక ఎదుగుదలను అంచనా వేసేందుకు రాష్ట్రవ్యాప్తంగా 33,949 మంది పిల్లలకు స్క్రీనింగ్ పూర్తి చేశామని తెలిపారు. అంగన్‌వాడీ కేంద్రాలతో పాటు, ఇళ్లకు వెళ్లి కూడా ఈ స్క్రీనింగ్ చేసేలా చర్యలు తీసుకుంటున్నట్లు వివరించారు.

ఈ సమీక్షకు కాన్ఫెడరేషన్ ఆఫ్ ఇండియన్ ఇండస్ట్రీ (సీఐఐ) డైరెక్టర్ జనరల్ చంద్రజీత్ బెనర్జీ, ఇతర ప్రతినిధులతో కలిసి సీఎం హాజరయ్యారు. ఈ సందర్భంగా ఆర్టీజీఎస్ పనితీరును, పాలనలో ఆర్టిఫిషియల్ ఇంటెలిజెన్స్ (ఏఐ) వంటి ఆధునిక టెక్నాలజీల వినియోగాన్ని ఐటీ కార్యదర్శి కాటంనేని భాస్కర్ సీఐఐ ప్రతినిధులకు వివరించారు. సీఐఐ గ్లోబల్ లీడర్‌షిప్ సెంటర్‌ను వీలైనంత త్వరగా ఏపీలో ఏర్పాటు చేయాలని సీఎం చంద్రబాబు కోరారు. ఈ సమావేశంలో ప్రభుత్వ ప్రధాన కార్యదర్శి సాయి ప్రసాద్, డీజీపీ హరీశ్ కుమార్ గుప్తా, ఇతర ఉన్నతాధికారులు పాల్గొన్నారు.