రెండో టీ20: ప్రిన్స్ యాదవ్ మ్యాజిక్.. ఐర్లాండ్‌ను కట్టడి చేసిన భారత్

ఐర్లాండ్‌తో జరుగుతున్న రెండో టీ20 మ్యాచ్‌లో భారత అరంగేట్ర బౌలర్ ప్రిన్స్ యాదవ్ తన అద్భుత ప్రదర్శనతో ఆకట్టుకున్నాడు. కీలక సమయంలో మూడు వికెట్లు పడగొట్టి ఐర్లాండ్ పరుగుల వేగానికి కళ్లెం వేశాడు. అతనితో పాటు ఇతర బౌలర్లు కూడా రాణించడంతో, టాస్ ఓడి తొలుత బ్యాటింగ్ చేసిన ఐర్లాండ్ జట్టు నిర్ణీత 20 ఓవర్లలో 8 వికెట్ల నష్టానికి 154 పరుగులు మాత్రమే చేయగలిగింది. ఈ మ్యాచ్ లో నెగ్గాలంటే టీమిండియా 155 పరుగులు చేయాల్సి ఉంది.

టాస్ గెలిచి బౌలింగ్ ఎంచుకున్న భారత కెప్టెన్ నిర్ణయం సరైనదేనని బౌలర్లు నిరూపించారు. ఆరంభంలోనే అర్ష్‌దీప్ సింగ్, హర్షిత్ రాణా ఐర్లాండ్ ఓపెనర్లను పెవిలియన్‌కు పంపారు. కేవలం 21 పరుగులకే రెండు వికెట్లు కోల్పోయి ఐర్లాండ్ కష్టాల్లో పడింది. ఈ దశలో క్రీజులోకి వచ్చిన హ్యారీ టెక్టర్ (53 పరుగులు) బాధ్యతాయుతమైన ఇన్నింగ్స్‌తో జట్టును ఆదుకున్నాడు. మరోవైపు కెప్టెన్ లోర్కాన్ టకర్‌తో కలిసి ఇన్నింగ్స్ చక్కదిద్దే ప్రయత్నం చేశాడు. అయితే, ప్రమాదకరంగా మారుతున్న ఈ జోడీని ప్రిన్స్ యాదవ్ విడదీశాడు. టకర్‌ను (15) ఔట్ చేసి భారత్‌కు కీలక బ్రేక్ ఇచ్చాడు.

ఆ తర్వాత బెంజమిన్ కాలిట్జ్‌తో (37) కలిసి టెక్టర్ మరో ముఖ్యమైన భాగస్వామ్యం నెలకొల్పాడు. వీరిద్దరూ నాలుగో వికెట్‌కు 65 పరుగులు జోడించడంతో ఐర్లాండ్ స్కోరు ఊపందుకుంది. అయితే, శివమ్ దూబే ఒకే ఓవర్లో కాలిట్జ్, గారెత్ డెలానీలను ఔట్ చేసి ఐర్లాండ్‌ను కోలుకోలేని దెబ్బతీశాడు. 

చివరి ఓవర్లలో ప్రిన్స్ యాదవ్ మళ్లీ విజృంభించాడు. హాఫ్ సెంచరీ పూర్తి చేసుకుని ప్రమాదకరంగా కనిపిస్తున్న హ్యారీ టెక్టర్‌తో పాటు లియామ్ మెకార్తీని ఔట్ చేసి ఐర్లాండ్‌ను భారీ స్కోరు చేయకుండా అడ్డుకున్నాడు. కెరీర్ లో తొలి అంతర్జాతీయ మ్యాచ్ ఆడుతున్న ప్రిన్స్ యాదవ్ 4 ఓవర్ల స్పెల్‌లో కేవలం 22 పరుగులు మాత్రమే ఇచ్చి 3 వికెట్లు పడగొట్టడం విశేషం. అర్ష్‌దీప్ సింగ్, శివమ్ దూబేలకు చెరో రెండు వికెట్లు దక్కాయి.