ఏపీలో 11 వేల మందికి ఓపీఎస్.. సీఎం చిత్రపటానికి పాలాభిషేకం
- ఏపీలో 11,000 మంది ఉద్యోగులకు పాత పెన్షన్ పునరుద్ధరణ
- 2004 తర్వాత చేరిన 2002-03 డీఎస్సీ అభ్యర్థులకు లబ్ధి
- ప్రభుత్వ నిర్ణయంపై హర్షం వ్యక్తం చేసిన ఉపాధ్యాయులు, ఉద్యోగులు
- సీఎం చంద్రబాబు చిత్రపటానికి పాలాభిషేకం చేసి కృతజ్ఞతలు
- పీఎస్యూ ఉద్యోగుల పదవీ విరమణ వయసు 62 ఏళ్లకు పెంపు
ప్రభుత్వ నిర్ణయంపై ఉపాధ్యాయులు, ఉద్యోగులు హర్షం వ్యక్తం చేశారు. విజయవాడ గాంధీనగర్లో శుక్రవారం నిర్వహించిన కృతజ్ఞతా సభలో ముఖ్యమంత్రి నారా చంద్రబాబు నాయుడు చిత్రపటానికి క్షీరాభిషేకం చేసి తమ సంతోషాన్ని పంచుకున్నారు. ఈ సందర్భంగా, ఈ మార్పు కోసం కృషి చేసిన జాయింట్ యాక్షన్ కమిటీ (జేఏసీ) ఛైర్మన్ ఎ. విద్యాసాగర్తో పాటు ఇతర ప్రతినిధులను ఘనంగా సన్మానించారు.
ఈ నిర్ణయం ఉద్యోగులకు గొప్ప ఊరటనిచ్చిందని, పెన్షన్ భద్రత అనేది ఉద్యోగుల ప్రాథమిక హక్కు అని విద్యాసాగర్ పేర్కొన్నారు. రాష్ట్రం ఆర్థిక ఇబ్బందుల్లో ఉన్నప్పటికీ ఉద్యోగుల ప్రయోజనాల దృష్ట్యా ప్రభుత్వం ఈ నిర్ణయం తీసుకోవడం అభినందనీయమని కొనియాడారు. గతంలో చంద్రబాబు హయాంలోనే సీపీఎస్ ఉద్యోగులకు ఫ్యామిలీ పెన్షన్, డెత్-కమ్-రిటైర్మెంట్ గ్రాట్యుటీ వంటి ప్రయోజనాలు కల్పించారని ఈ సందర్భంగా నేతలు గుర్తుచేశారు.
2004 సెప్టెంబరుకు ముందు వెలువడిన నోటిఫికేషన్ల ద్వారా ఎంపికైన అర్హులైన ఉద్యోగులకు ఓపీఎస్ ప్రయోజనాలు కల్పించాలని ఈ వారం మొదట్లో జరిగిన కేబినెట్ సమావేశంలో నిర్ణయించారు. దీనితో పాటు ప్రభుత్వ రంగ సంస్థలు (పీఎస్యూ), సొసైటీలు, రెసిడెన్షియల్ సంస్థల ఉద్యోగుల పదవీ విరమణ వయసును 62 ఏళ్లకు పెంచుతూ ప్రభుత్వం ప్రకటన విడుదల చేసింది.
