రూ.4 కోట్ల జీతం వదిలేసి.. బార్బిక్యూ రెస్టారెంట్తో కోట్లు సంపాదిస్తున్న టెక్కీ!
- మైక్రోసాఫ్ట్, గూగుల్ లాంటి సంస్థల్లో పనిచేసిన సలాహుద్దీన్ అబ్దుల్-కఫీ
- ఏడాదికి రూ.4.25 కోట్ల జీతం వదులుకొని టెక్ పరిశ్రమ నుంచి బయటకు
- టెక్సాస్లో 'కఫీ బీబీక్యూ' పేరుతో హలాల్ బార్బిక్యూ రెస్టారెంట్ ప్రారంభం
- తొలి ఏడాదే రూ.21 కోట్లకు పైగా ఆదాయం
- ఈ ఏడాది రూ.37 కోట్లు దాటుతుందని అంచనా
టెక్ ప్రపంచంపై విరక్తితో..
దాదాపు 14 ఏళ్ల పాటు టెక్ పరిశ్రమలో పనిచేసిన అబ్దుల్-కఫీ, ఆ రంగంపై పూర్తి నిరాశకు గురయ్యాడు. టెక్ కంపెనీల ప్రధాన లక్ష్యం ప్రజల జీవితాలను మెరుగుపరచడం కాకుండా, కేవలం డబ్బు సంపాదించడంపైనే ఉందని గ్రహించాడు. ఈ ధోరణి నచ్చకే శాన్ ఫ్రాన్సిస్కోలోని తన ఉన్నత ఉద్యోగానికి రాజీనామా చేశాడు. జీతంలో ఏకంగా 50 శాతానికి పైగా కోతను అంగీకరించి, ఒక మతపరమైన స్వచ్ఛంద సంస్థలో చేరాడు.
స్నేహితుల ప్రోత్సాహంతో వ్యాపారం ప్రారంభం
స్వచ్ఛంద సంస్థలో పనిచేస్తూనే, తనకిష్టమైన వంటపై దృష్టి పెట్టాడు. స్నేహితుల కోసం తరచూ ఇంట్లో విందులు, బార్బిక్యూ పార్టీలు ఏర్పాటు చేసేవాడు. ముఖ్యంగా అతను తయారుచేసే హలాల్ బ్రిస్కెట్స్ (ఒక రకమైన బార్బిక్యూ మాంసం) రుచి చూసిన స్నేహితులు, ఇంతకుముందెన్నడూ ఇలాంటి వంటకం తినలేదని ప్రశంసించేవారు. అప్పుడే అబ్దుల్-కఫీకి ఒక ఆలోచన వచ్చింది.
"టెక్సాస్ బార్బిక్యూలో లేని కొత్తదనాన్ని అందించగలనేమో అనిపించింది. స్నేహితులు నా వంటను మెచ్చుకుంటున్నప్పుడు, దీనికి మార్కెట్లో ఆదరణ ఉంటుందని నమ్మాను," అని అబ్దుల్-కఫీ ఒక ఇంటర్వ్యూలో తెలిపారు. ఈ ఆలోచనతోనే 2024 డిసెంబర్లో 'కఫీ BBQ' పేరుతో ఒక హలాల్ బార్బిక్యూ రెస్టారెంట్ను ప్రారంభించాడు.
ఊహించని విజయం.. కోట్లలో ఆదాయం
ప్రారంభించిన రోజునే ఊహించని స్పందన లభించింది. మూడు రోజులకు సరిపడా సిద్ధం చేసుకున్న బార్బిక్యూ మొత్తం కేవలం ఒక్క రోజులోనే అమ్ముడుపోయింది. ఆ రాత్రే మళ్లీ వంట మొదలుపెట్టి, మరుసటి రోజుకు సిద్ధం చేయాల్సి వచ్చిందని అబ్దుల్-కఫీ గుర్తుచేసుకున్నాడు. కొద్దికాలంలోనే అతని రెస్టారెంట్ టెక్సాస్ రాష్ట్రవ్యాప్తంగా ప్రసిద్ధి చెందింది.
గతేడాది అతని రెస్టారెంట్ ఆదాయం రూ.21.7 కోట్లు కాగా, ఈ ఏడాది అది రూ.37.8 కోట్లకు చేరుకుంటుందని అంచనా వేస్తున్నారు. అయితే, ఈ భారీ ఆదాయం వెనుక కఠోర శ్రమ, ఆర్థిక సవాళ్లు కూడా ఉన్నాయి. "రెస్టారెంట్ ప్రారంభించినప్పటి నుంచి ఇప్పటివరకు నా జీతంగా ఒక్క డాలర్ కూడా తీసుకోలేదు. నా పొదుపు డబ్బుతోనే జీవిస్తున్నాను" అని అతను వివరించాడు.
రెస్టారెంట్ ఏర్పాటుకు సుమారు (సుమారు రూ. 9.4 కోట్లు) ఖర్చయిందని, ఆ పెట్టుబడి ఇంకా తిరిగి రాలేదని చెప్పాడు. ఆహారానికి రూ.1.18 కోట్లు, సిబ్బంది జీతాలకు రూ. 47.38 లక్షలు, అద్దెకు రూ. 14.21లక్షలు సహా మార్కెటింగ్, ఇతర ఖర్చులతో కలిపి నెలకు సుమారు రూ.2.03 కోట్లు ఖర్చవుతుందని తెలిపాడు. అయినప్పటికీ ఇష్టమైన పనిలో దొరికే సంతృప్తి ముందు ఈ కష్టం ఏమాత్రం కాదని అబ్దుల్-కఫీ నమ్మకంగా చెబుతున్నాడు.
