సైలెంట్ కిల్లర్ కిడ్నీ క్యాన్సర్.. ఈ ఒక్క లక్షణాన్ని అస్సలు నిర్లక్ష్యం చేయొద్దు!

కిడ్నీ క్యాన్సర్‌ను వైద్య పరిభాషలో ఒక నిశ్శబ్ద వ్యాధి" (సైలెంట్ డిసీజ్) అని పిలుస్తారు. దీనికి కారణం, ఈ వ్యాధి ఎలాంటి స్పష్టమైన లక్షణాలు చూపించకుండానే నెలల తరబడి, కొన్నిసార్లు సంవత్సరాల పాటు శరీరంలో పెరుగుతూ ఉంటుంది. కిడ్నీలో కణితి (ట్యూమర్) అభివృద్ధి చెందుతున్నా, చాలా మందికి ఆ విషయం తెలియకుండానే తమ రోజువారీ పనులు చేసుకుంటూ ఉంటారు. వ్యాధి లక్షణాలు స్పష్టంగా బయటపడే సమయానికి, అది ముదిరిపోయి ఉండే ప్రమాదం ఉంది. అప్పుడు చికిత్స కూడా చాలా సంక్లిష్టంగా మారుతుంది.

కిడ్నీ క్యాన్సర్‌ను గుర్తించేందుకు అత్యంత ముఖ్యమైన, తొలి హెచ్చరిక మూత్రంలో రక్తం కనిపించడం. దీనిని వైద్యపరంగా 'హెమటూరియా' అంటారు. అయితే, మూత్రంలో రక్తం వస్తే అది కచ్చితంగా క్యాన్సర్ అని చెప్పలేం. కానీ, ఈ లక్షణాన్ని ఎట్టి పరిస్థితుల్లోనూ నిర్లక్ష్యం చేయవద్దని ఆరోగ్య నిపుణులు హెచ్చరిస్తున్నారు. ఒకవేళ రక్తస్రావం దానంతట అదే ఆగిపోయినా లేదా నొప్పి లేకుండా వచ్చినా, వెంటనే వైద్యులను సంప్రదించి పరీక్షలు చేయించుకోవడం తప్పనిసరి. తొలిదశలో వ్యాధిని గుర్తిస్తే, చికిత్స విజయవంతం అయ్యే అవకాశాలు చాలా ఎక్కువగా ఉంటాయి.

మూత్రంలో రక్తం ఎందుకు వస్తుంది?
ఈ విషయంపై ఢిల్లీలోని సీకే బిర్లా హాస్పిటల్ యూరాలజీ కన్సల్టెంట్ డాక్టర్ రిషి రాజ్ వోహ్రా వివరిస్తూ.. "కిడ్నీలోని కణితులు నొప్పి లేదా ఇతర లక్షణాలు లేకుండానే నిశ్శబ్దంగా పెరుగుతాయి. కణితి పెరిగి కిడ్నీలోని మూత్రాన్ని సేకరించే వ్యవస్థను (పెల్విస్, కాలిసియల్ సిస్టమ్) ప్రభావితం చేసినప్పుడు మూత్రంలో రక్తం కనిపించడం మొదలవుతుంది. కొన్నిసార్లు ఈ డ్రైనేజ్ మార్గాల్లో మొదలయ్యే క్యాన్సర్ల వల్ల ఇంకా ముందుగానే రక్తస్రావం జరగవచ్చు" అని తెలిపారు. 

చాలా మందిలో రక్తస్రావం కొద్దిసేపటికే ఆగిపోవడంతో సమస్య తగ్గిపోయిందని అపోహ పడతారు. కానీ, ఇది చాలా ప్రమాదకరమని, లక్షణాలు మళ్లీ కనిపించే వరకు వేచి చూస్తే వ్యాధి ముదిరిపోయి చికిత్సా అవకాశాలు తగ్గిపోతాయని ఆయన హెచ్చరించారు.

నొప్పి లేకపోయినా ప్రమాదమే
మూత్రంలో రక్తంతో పాటు నొప్పి ఉంటేనే అది ప్రమాదకరం అనేది ఒక పెద్ద అపోహ మాత్రమేనని వైద్యులు అంటున్నారు. కిడ్నీ క్యాన్సర్ తరచుగా నొప్పి లేకుండానే రక్తస్రావానికి కారణమవుతుందని, అందుకే చాలా మంది దీనిని తేలికగా తీసుకుంటారనేది వైద్య నిపుణుల అభిప్రాయం. కొన్నిసార్లు మూత్రం గులాబీ, ఎరుపు లేదా కోలా రంగులో కనిపించవచ్చు. మరికొన్ని సందర్భాల్లో రక్తం చాలా తక్కువ పరిమాణంలో ఉండటం వల్ల కేవలం మూత్ర పరీక్ష (మైక్రోస్కోపిక్ హెమటూరియా) ద్వారా మాత్రమే గుర్తించగలరు. రక్తం కనిపించినా, కనిపించకపోయినా.. పరీక్షల్లో తేలితే మాత్రం తదుపరి వైద్య పరిశోధనలు తప్పనిసరి.

ఎవరు ఎక్కువ జాగ్రత్తగా ఉండాలి?

• 50 ఏళ్లు పైబడిన వారు
• పొగతాగే అలవాటు ఉన్నవారు
• అధిక బరువు (ఊబకాయం)తో బాధపడేవారు
• అధిక రక్తపోటు (హై బీపీ) ఉన్నవారు
• కుటుంబంలో ఎవరికైనా కిడ్నీ క్యాన్సర్ చరిత్ర ఉన్నవారు

ఈ కేటగిరీలకి చెందిన వారు మూత్రంలో రక్తం ఒక్కసారి కనిపించినా వెంటనే అప్రమత్తం కావాలి. మూత్రపిండాల్లో రాళ్లు, యూరినరీ ఇన్ఫెక్షన్ల వంటి అనేక ఇతర కారణాల వల్ల కూడా రక్తస్రావం జరగవచ్చు. అయితే, సరైన వైద్య పరీక్షల ద్వారానే అసలు కారణాన్ని నిర్ధారించగలరు.

వైద్యులు సాధారణంగా మూత్ర పరీక్షతో ప్రారంభించి, అవసరాన్ని బట్టి అల్ట్రాసౌండ్, సీటీ స్కాన్ వంటి ఇమేజింగ్ పరీక్షలను సిఫార్సు చేస్తారు. తొలిదశలో గుర్తిస్తే కిడ్నీ క్యాన్సర్‌కు చికిత్స చాలా సులభం. అందుకే ఒక్కసారి మూత్రంలో రక్తం కనిపించినా నిర్లక్ష్యం చేయకుండా వెంటనే నిపుణులను సంప్రదిస్తే ప్రాణాలను కాపాడుకోవచ్చని వైద్యులు భరోసా ఇస్తున్నారు.