చెవుల్లో హోరు వినిపిస్తోందా? నిర్లక్ష్యం చేయొద్దు!

మన చుట్టూ ఎలాంటి శబ్దం లేకపోయినా, చెవుల్లో గంటలు మోగినట్లుగా లేదా ఏదో హోరు వినిపిస్తున్నట్లుగా అనిపిస్తుందా? చాలామంది ఎదుర్కొనే ఈ సమస్యను వైద్య పరిభాషలో 'టిన్నిటస్' అంటారు. దీనిని తేలిగ్గా తీసుకోకూడదని, నిర్లక్ష్యం చేస్తే మరిన్ని ఇబ్బందులు తలెత్తవచ్చని వైద్య నిపుణులు హెచ్చరిస్తున్నారు.

టిన్నిటస్ ఎందుకు వస్తుంది?
సాధారణంగా చెవి లోపల ఉండే అత్యంత సున్నితమైన కేశ కణాలు (Hair Cells) దెబ్బతిన్నప్పుడు ఈ సమస్య మొదలవుతుంది. ఈ కణాలు మెదడుకు తప్పుడు సంకేతాలు పంపడం వల్ల, బయట ఎలాంటి శబ్దం లేకపోయినా మనకు శబ్దాలు వినిపిస్తున్నట్లు భ్రమ కలుగుతుంది.

అధిక శబ్దాలు వెలువడే ప్రదేశాల్లో ఎక్కువ సేపు ఉండటం, వయసు పెరగడం వల్ల వచ్చే వినికిడి లోపం, తీవ్రమైన ఒత్తిడి, ఆందోళన, రక్తపోటులో మార్పులు, చెవిలో గులిమి (మైనం) ఎక్కువగా పేరుకుపోవడం వంటివి టిన్నిటస్‌కు ప్రధాన కారణాలుగా చెప్పవచ్చు.

నియంత్రణకు మార్గాలు
ఈ సమస్యను నియంత్రణలో ఉంచుకోవడానికి కొన్ని జాగ్రత్తలు తీసుకోవాలి. శబ్ద కాలుష్యానికి వీలైనంత దూరంగా ఉండటం, యోగా లేదా ధ్యానం ద్వారా ఒత్తిడిని తగ్గించుకోవడం, రక్తపోటును అదుపులో పెట్టుకోవడం, రోజూ తగినంత నిద్రపోవడం చాలా అవసరం. ఒకవేళ చెవుల్లో రింగింగ్ శబ్దం తరచుగా లేదా నిరంతరంగా ఇబ్బంది పెడుతుంటే, ఏమాత్రం ఆలస్యం చేయకుండా వెంటనే ఈఎన్‌టీ (చెవి, ముక్కు, గొంతు) వైద్యులను సంప్రదించాలి. ప్రాథమిక దశలో గుర్తిస్తే చికిత్స ద్వారా దీనిని సమర్థంగా నియంత్రించవచ్చు.