మ్యాగీ నూడుల్స్లో పురుగులు..? స్పందించిన నెస్లే ఇండియా
- మ్యాగీ నూడుల్స్లో పురుగులు ఉన్నాయన్న ఆరోపణలు
- సోషల్ మీడియా పోస్ట్ ఆధారంగా నోటీసులు జారీ చేసిన ఎఫ్ఎస్ఎస్ఏఐ
- ఆరోపణలను తీవ్రంగా ఖండించిన నెస్లే ఇండియా
- ల్యాబ్ పరీక్షల్లో నూడుల్స్ సురక్షితమని తేలినట్లు వెల్లడి
- ఎఫ్ఎస్ఎస్ఏఐకి వివరణ, ల్యాబ్ రిపోర్టులు సమర్పించిన కంపెనీ
శుక్రవారం నెస్లే ఇండియా స్టాక్ ఎక్స్ఛేంజీలకు ఈ విషయంపై ఒక ప్రకటన సమర్పించింది. 'ఎక్స్'లోని ఒక అపరిచిత ఖాతా చేసిన పోస్ట్ ఆధారంగా 'ఎఫ్ఎస్ఎస్ఏఐ' తమను సంప్రదించిందని తెలిపింది. సదరు ఫిర్యాదుదారుడిని సంప్రదించేందుకు పలుమార్లు ప్రయత్నించినప్పటికీ ఫలితం లేదని, ప్రస్తుతం ఆ సోషల్ మీడియా ఖాతా కూడా అందుబాటులో లేదని కంపెనీ పేర్కొంది. "మ్యాగీ నూడుల్స్లో పురుగులు ఉన్నాయంటూ అపరిచిత ఖాతా నుంచి వచ్చిన ఆరోపణలను మేము పూర్తిగా తోసిపుచ్చుతున్నాము" అని నెస్లే ఇండియా తన ప్రకటనలో స్పష్టం చేసింది.
ప్రముఖ మీడియా సంస్థల కథనాల ప్రకారం, ఆరోపణలు ఎదుర్కొంటున్న బ్యాచ్కు చెందిన నమూనాలను ఎఫ్ఎస్ఎస్ఏఐ గుర్తింపు పొందిన స్వతంత్ర ల్యాబ్లో పరీక్షించగా, ఎటువంటి పురుగులు లేదా నాణ్యతా లోపాలు ఉన్నట్లు తేలలేదని నెస్లే వెల్లడించింది. దీనికి సంబంధించిన నాణ్యతా రికార్డులు, బ్యాచ్ డేటా, ల్యాబ్ నివేదికలతో కూడిన సమగ్ర వివరణను ఎఫ్ఎస్ఎస్ఏఐకి సమర్పించినట్లు కంపెనీ వివరించింది. ఈ పక్కా ఆధారాలతో ఈ వివాదం త్వరలోనే పరిష్కారమవుతుందని కంపెనీ విశ్వాసం వ్యక్తం చేసింది.
