ఒకప్పుడు పార్లే జి బిస్కెట్లు తిని కడుపు నింపుకున్నాడు... ఇవాళ బాలీవుడ్ స్టార్!

బాలీవుడ్‌లో విలక్షణ నటుడిగా తనకంటూ ఒక ప్రత్యేక గుర్తింపు సంపాదించుకున్న రాజ్‌కుమార్ రావు, ఈ స్థాయికి చేరుకోవడానికి ఎన్నో ఒడిదుడుకులను ఎదుర్కొన్నారు. కెరీర్ ప్రారంభంలో తీవ్ర ఆర్థిక ఇబ్బందులు, అవమానాలను ఎదుర్కొన్నట్లు ఆయన తాజాగా వెల్లడించారు. నటనపై మక్కువతో ముంబైకి వచ్చిన కొత్తలో తన బ్యాంకు ఖాతాలో కేవలం 18 రూపాయలు మాత్రమే ఉండేవని, ఒకే ఒక్క పార్లే-జి బిస్కెట్ ప్యాకెట్‌తో రోజంతా గడిపిన సందర్భాలు ఉన్నాయని ఆయన గుర్తుచేసుకున్నారు.

తన కష్టకాలంలో ఫిల్మ్ స్కూల్ స్నేహితులు అండగా నిలిచారని రాజ్‌కుమార్ తెలిపారు. నటన తప్ప తనకు మరో 'ప్లాన్ బి' ఎప్పుడూ లేదని, నటుడు కావాలన్న బలమైన సంకల్పంతోనే ముంబైలో నిలదొక్కుకున్నానని చెప్పారు. అవకాశాల కోసం ప్రయత్నిస్తున్న సమయంలో తన రూపంపై అనేక విమర్శలు ఎదుర్కొన్నట్లు కూడా ఆయన పేర్కొన్నారు. "మీరు పొడవుగా లేరు, మీ శరీరాకృతి సరిగా లేదు, కనుబొమ్మల ఆకృతి కూడా బాగాలేదు" అంటూ తనను తిరస్కరించేవారని, ఆ సమయంలో "మరి నటన సంగతేంటి?" అని తాను ప్రశ్నించేవాడినని ఆనాటి చేదు అనుభవాలను పంచుకున్నారు.

గురుగ్రామ్‌లో జన్మించిన రాజ్ కుమార్ రావు, ఫిల్మ్ అండ్ టెలివిజన్ ఇన్‌స్టిట్యూట్ ఆఫ్ ఇండియాలో శిక్షణ పొందారు. 2010లో 'లవ్ సెక్స్ ఔర్ ధోకా' చిత్రంతో సినీ అరంగేట్రం చేసిన ఆయన, 'కై పో చే!', 'షాహిద్' వంటి సినిమాలతో విమర్శకుల ప్రశంసలు అందుకున్నారు. 'షాహిద్' చిత్రానికిగానూ ఆయన జాతీయ అవార్డును సైతం గెలుచుకున్నారు. 2018లో విడుదలైన 'స్త్రీ' సినిమాతో కమర్షియల్ హీరోగా ఎదిగిన రాజ్ కుమార్, ఇటీవలి వచ్చిన 'స్త్రీ 2'తో తన మార్కెట్‌ను మరింత సుస్థిరం చేసుకున్నారు. ప్రస్తుతం ఆయన 'ప్రహార్', సౌరవ్ గంగూలీ బయోపిక్ 'దాదా', 'రఫ్తార్' వంటి చిత్రాల్లో నటిస్తున్నారు.