గిల్‌కు రోహిత్‌, కోహ్లీ అండ ఉంటే వరల్డ్‌కప్‌లో భారత్‌కు తిరుగుండదు: రైనా

2027 వన్డే వరల్డ్‌కప్‌లో భారత జట్టుకు రోహిత్‌ శర్మ, విరాట్‌ కోహ్లీ అనుభవం ఎంతో ఉపయోగపడుతుందని మాజీ క్రికెటర్‌ సురేశ్‌ రైనా అభిప్రాయపడ్డాడు. యువ కెప్టెన్‌ శుభ్‌మన్‌ గిల్‌కు ఈ ఇద్దరు సీనియర్లు అండగా ఉంటే జట్టుకు మరింత బలం చేకూరుతుందని చెప్పాడు. పెద్ద టోర్నీల్లో అనుభవం ఎంతో కీలకమని పేర్కొన్నాడు.

రోహిత్‌, కోహ్లీ ఇప్పటికే టీ20లు, టెస్టులకు వీడ్కోలు పలికారు. ప్రస్తుతం వన్డే క్రికెట్‌పైనే దృష్టి పెట్టారు. వరల్డ్‌కప్‌ల్లో ఇద్దరికీ అద్భుతమైన రికార్డులు ఉన్నాయని రైనా గుర్తు చేశాడు. 2019 వరల్డ్‌కప్‌లో రోహిత్‌ అత్యధిక పరుగులు సాధించగా, 2023 వరల్డ్‌కప్‌లో కోహ్లీ టోర్నీలో టాప్‌ స్కోరర్‌గా నిలిచాడని చెప్పాడు. ఐసీసీ టోర్నీల్లో విజయాలు సాధించిన అనుభవం ఈ ఇద్దరి సొంతమని రైనా పేర్కొన్నాడు. నాకౌట్‌ మ్యాచ్‌ల్లో ఒత్తిడిని ఎలా ఎదుర్కోవాలో వారికి బాగా తెలుసని చెప్పాడు. అలాంటి ఆటగాళ్లు జట్టులో ఉండటం యువ క్రికెటర్లకు కూడా ఎంతో ఉపయోగపడుతుందని అభిప్రాయపడ్డాడు.

గిల్‌ తొలిసారి వన్డే వరల్డ్‌కప్‌లో భారత జట్టును నడిపించే అవకాశం ఉంటుందని భావిస్తున్న నేపథ్యంలో రోహిత్‌, కోహ్లీ సలహాలు అతడికి ఎంతో దోహదపడతాయని రైనా అన్నాడు. మైదానంలోనే కాకుండా బయట కూడా వారి అనుభవం జట్టుకు ఉపయోగపడుతుందని వివరించాడు. ఒత్తిడి ఎక్కువగా ఉండే టోర్నీల్లో ఇలాంటి సీనియర్లు మ్యాచ్‌ ఫలితాలను ప్రభావితం చేయగలరని పేర్కొన్నాడు.

మరోవైపు మాజీ కెప్టెన్‌, కోచ్‌ అనిల్‌ కుంబ్లే కూడా గిల్‌పై ప్రశంసలు కురిపించాడు. కెప్టెన్సీ బాధ్యతలు వచ్చినా అతడి బ్యాటింగ్‌పై ప్రభావం పడలేదని చెప్పాడు. ఐపీఎల్‌లోనూ గిల్‌ బౌలర్లను సమర్థంగా బరిలోకి దించాడని, ఒత్తిడిని సమర్థంగా అధిగమించాడని కొనియాడాడు.

గిల్‌కు అనుభవజ్ఞులైన ఆటగాళ్ల మద్దతు ఉండటం మరో పెద్ద ప్లస్‌ పాయింట్‌ అని కుంబ్లే పేర్కొన్నాడు. రోహిత్‌, కోహ్లీ వంటి ఆటగాళ్లు మైదానంలో ఉండటం వల్ల ఫీల్డ్‌ సెట్టింగ్స్‌, బౌలింగ్‌ మార్పులు, వ్యూహాత్మక నిర్ణయాల్లో గిల్‌కు సహాయం లభిస్తుందని చెప్పాడు. అందుకే కెప్టెన్సీ భారం మొత్తం అతడిపై పడదని వ్యాఖ్యానించాడు.