విడాకుల కేసు... జయం రవికి కోర్టులో ఎదురుదెబ్బ

ప్రముఖ తమిళ నటుడు జయం రవికి మద్రాస్ హైకోర్టులో చుక్కెదురైంది. తన భార్య ఆర్తికి మధ్యంతర భరణం చెల్లింపునకు సంబంధించిన కేసులో, ఫ్యామిలీ వెల్ఫేర్ కోర్టుకు ఇచ్చిన గడువును పొడిగించాలంటూ ఆయన దాఖలు చేసిన పిటిషన్‌ను న్యాయస్థానం మంగళవారం కొట్టివేసింది. రెండు వారాల్లోగా భరణం అంశాన్ని తేల్చాలని గతంలో ఇచ్చిన ఆదేశాలు యథాతథంగా కొనసాగుతాయని కోర్టు స్పష్టం చేసింది.

విడాకుల కేసు విచారణలో ఉన్న నేపథ్యంలో, 2025 ఏప్రిల్ నుంచి తనకు మరియు పిల్లల పాఠశాల ఫీజులకు సంబంధించి జయం రవి మధ్యంతర భరణం చెల్లించడం లేదని ఆర్తి గతంలో హైకోర్టును ఆశ్రయించారు. దీనిపై స్పందించిన హైకోర్టు, రెండు వారాల్లో వ్యవధిలో ఈ పిటిషన్‌ను విచారించి తగిన ఉత్తర్వులు జారీ చేయాలని చెన్నై ఫ్యామిలీ వెల్ఫేర్ కోర్టును ఆదేశించింది.

ఈ గడువును పొడిగించాలని కోరుతూ జయం రవి తాజాగా పిటిషన్ దాఖలు చేయగా, జస్టిస్ అబ్దుల్ ఖుద్దూస్ సమక్షంలో విచారణకు వచ్చింది. అయితే, ఈ అభ్యర్థనను ఆర్తి తరఫు సీనియర్ న్యాయవాది జె.రవీంద్రన్ తీవ్రంగా వ్యతిరేకించారు. ఇరుపక్షాలు వాదనలు విన్న న్యాయమూర్తి, జయం రవి అభ్యర్థనను తిరస్కరించారు. ఏవైనా ఇతర విన్నపాలు ఉంటే ఫ్యామిలీ వెల్ఫేర్ కోర్టులోనే పరిష్కరించుకోవాలని సూచించారు.

గత కొంతకాలంగా జయం రవి, ఆర్తిల విడాకుల వ్యవహారం మీడియాలో చర్చనీయాంశంగా మారింది. విడాకులు ప్రక్రియ పూర్తయ్యే వరకు నటనకు విరామం ఇస్తున్నట్లు జయం రవి గతంలో చెన్నైలో నిర్వహించిన మీడియా సమావేశంలో భావోద్వేగంగా ప్రకటించారు. ఈ వ్యక్తిగత వివాదాలు కొనసాగుతున్నప్పటికీ, జయం రవి రాఘవ లారెన్స్‌తో కలిసి నటిస్తున్న 'బెంజ్', తన దర్శకత్వంలో వస్తున్న 'యాన్ ఆర్డినరీ మ్యాన్', 'కరాటే బాబు', 'జీనీ' వంటి చిత్రాలు వివిధ నిర్మాణ దశల్లో ఉన్నాయి.