ఈసారి మూడు నగరాల్లో ఏపీఎల్ 2026.. జూన్ 9 నుంచి క్రికెట్ పండగ
- జూన్ 9 నుంచి 30 వరకు ఆంధ్రా ప్రీమియర్ లీగ్ 2026
- ఈసారి విశాఖ, కడప, మంగళగిరిలో మ్యాచ్ల నిర్వహణ
- కడప, మంగళగిరి స్టేడియాలలో కొత్తగా ఫ్లడ్లైట్ల ఏర్పాటు
- యువ ప్రతిభను వెలికితీయడమే ఏపీఎల్ లక్ష్యమన్న కేశినేని చిన్ని
- పాఠశాల, కళాశాల విద్యార్థులకు ఉచిత పాసులతో స్టేడియంలోకి ప్రవేశం
గత సీజన్ల మాదిరిగా కాకుండా, ఈసారి ఏపీఎల్ మ్యాచ్లను విశాఖపట్నం, కడప, మంగళగిరి వేదికలుగా నిర్వహించనున్నారు. జూన్ 9న విశాఖపట్నంలో టోర్నమెంట్ ప్రారంభం కానుండగా, ఇక్కడ జూన్ 13 వరకు తొలి దశ మ్యాచ్లు జరుగుతాయి. అనంతరం జూన్ 17 నుంచి 21 వరకు రాయలసీమ ప్రాంతానికి ప్రాతినిధ్యం వహిస్తూ కడపలో రెండో దశ మ్యాచ్లు నిర్వహిస్తారు. ఇక చివరిగా, జూన్ 24 నుంచి 30 వరకు అమరావతి రాజధాని ప్రాంతంలోని మంగళగిరిలో ఫైనల్స్తో సహా చివరి దశ మ్యాచ్లు జరుగుతాయని కేశినేని చిన్ని వివరించారు.
మూడు ప్రాంతాల్లో ఫ్లడ్లైట్ సౌకర్యం
గతంలో విశాఖపట్నంలో మాత్రమే ఫ్లడ్లైట్ సౌకర్యం ఉండగా, ఈసారి కడప, మంగళగిరి స్టేడియాలలో కూడా ఏసీఏ ఆధ్వర్యంలో కొత్తగా ఫ్లడ్లైట్లను ఏర్పాటు చేసినట్లు చిన్ని తెలిపారు.
"మంగళగిరి స్టేడియంలో రెనోవేషన్ పనులు వేగంగా జరుగుతున్నాయి, వారం రోజుల్లో పూర్తవుతాయి. మంగళగిరిలో రోడ్ల వంటి మౌలిక సదుపాయాల కల్పనకు కూడా ప్రభుత్వాన్ని కోరాం," అని ఆయన వెల్లడించారు. జూన్ 30న మంగళగిరిలో జరిగే గ్రాండ్ ఫైనల్కు ముఖ్య అతిథిగా రాష్ట్ర ఐటీ, యువజన సర్వీసుల శాఖ మంత్రి నారా లోకేష్ను ఆహ్వానించాలని భావిస్తున్నట్లు తెలిపారు. క్రీడలను, క్రీడాకారులను ప్రోత్సహించడంలో లోకేష్ చూపే ఆసక్తి దృష్ట్యా ఆయన రాక టోర్నీకి మరింత శోభనిస్తుందని ఆశాభావం వ్యక్తం చేశారు.
యువ ప్రతిభకు వేదిక ఏపీఎల్
ఏపీఎల్ ముఖ్య ఉద్దేశం కేవలం వినోదం పంచడమే కాదని, గ్రామీణ ప్రాంతాల్లోని యువ ప్రతిభను వెలికితీయడమేనని కేశినేని చిన్ని స్పష్టం చేశారు. "గత ఏపీఎల్ సీజన్ల ద్వారా ఎందరో యువ క్రీడాకారులు వెలుగులోకి వచ్చారు. ఏపీఎల్-2లో రాణించిన నితీష్ కుమార్ రెడ్డి ఆ తర్వాత సన్రైజర్స్ హైదరాబాద్ జట్టుకు ఎంపికయ్యారు.
అలాగే, ఇటీవల ప్రకటించిన ఇండియా-ఏ జట్టులో గుంటూరుకు చెందిన షేక్ రషీద్, ఇండియా ఎమర్జింగ్ టీమ్లో టి.విజయ్, కేఎస్ఎన్ రాజు వంటి వాళ్లకు చోటు దక్కింది. వీరంతా భవిష్యత్తులో భారత జట్టుకు ప్రాతినిధ్యం వహించగల సత్తా ఉన్నవాళ్లే" అని చిన్ని ధీమా వ్యక్తం చేశారు. బీసీసీఐ నిబంధనల ప్రకారం, ఈ లీగ్లో కేవలం ఆంధ్రాకు చెందిన క్రీడాకారులు మాత్రమే ఆడతారని, తద్వారా స్థానిక యువతకు అద్భుతమైన అవకాశం లభిస్తుందని ఆయన పేర్కొన్నారు.
అభిమానుల కోసం ప్రత్యేక ఏర్పాట్లు, ప్రచారం
గతంలో సెమీ ఫైనల్కు 14,000, ఫైనల్కు 18,000 మంది ప్రేక్షకులు హాజరయ్యారని, ఈసారి అంతకుమించి అభిమానులను ఆకర్షించేందుకు విస్తృత ఏర్పాట్లు చేస్తున్నట్లు చిన్ని తెలిపారు. మ్యాచ్ల షెడ్యూల్, సమయం వంటి వివరాలపై గందరగోళం లేకుండా ఉండేందుకు పెద్ద ఎత్తున అవగాహన కార్యక్రమాలు చేపట్టనున్నట్లు చెప్పారు.
"ప్రతి కాలేజీ, పాఠశాల నోటీస్ బోర్డులపై షెడ్యూల్ వివరాలు ఉంచుతాం. విశాఖ, కడప, గుంటూరు, విజయవాడ నగరాల్లో ఫ్లాష్ మాబ్లు, హోర్డింగులు ఏర్పాటు చేస్తున్నాం," అని ఆయన వివరించారు. ముఖ్యంగా ప్రభుత్వ పాఠశాలలు, కళాశాలల విద్యార్థులకు ఉచిత పాసులు అందించి, వారిని మ్యాచ్లు వీక్షించేందుకు ప్రోత్సహిస్తామన్నారు.
ఈ టోర్నమెంట్లో మొత్తం 7 జట్లు పాల్గొంటాయని, ప్రతి జట్టు 8 మ్యాచ్లు ఆడుతుందని తెలిపారు. మ్యాచ్లన్నీ జియో స్టార్ (Jio Star) ద్వారా ప్రత్యక్ష ప్రసారం అవుతాయని వెల్లడించారు. స్పాన్సర్లు, ఇతర పూర్తి వివరాలను ఏపీఎల్ గవర్నింగ్ కౌన్సిల్ త్వరలో వైజాగ్లో జరిగే ప్రెస్ మీట్లో వెల్లడిస్తుందని చెప్పారు.
తెలంగాణలో జరుగుతున్న లీగ్తో పోల్చగా, వారి వద్ద జట్టు విలువలు అధికంగా ఉన్నప్పటికీ, క్రీడా స్ఫూర్తిని నింపడంలో, కొత్త ప్రతిభను ప్రోత్సహించడంలో ఏపీఎల్ ఏమాత్రం తీసిపోదని, ఇది నాలుగో సంవత్సరం కావడంతో తమకు మరింత అనుభవం ఉందని చిన్ని అన్నారు. ఈ క్రికెట్ యజ్ఞాన్ని విజయవంతం చేయడంలో మీడియా కూడా కీలక పాత్ర పోషించాలని, ఐపీఎల్ తరహాలో ఏపీఎల్ మ్యాచ్లపైనా, క్రీడాకారుల ప్రతిభపైనా ప్రత్యేక కథనాలు ప్రసారం చేసి యువతను ప్రోత్సహించాలని ఆయన విజ్ఞప్తి చేశారు.
