మోదీపై పశ్చిమ దేశాల ఒత్తిడి వ్యర్థం: పుతిన్
- మోదీపై ఒత్తిడి అంతర్జాతీయ స్థిరత్వానికే విఘాతమని పుతిన్ వ్యాఖ్య
- భారత్ ఆర్థిక వృద్ధిపై ప్రశంసల జల్లు
- భారత్ను నమ్మకమైన భాగస్వామిగా పేర్కొన్న రష్యా
- భారత్ సొంత ప్రయోజనాలకే ప్రాధాన్యం ఇస్తుందని స్పష్టీకరణ
మోదీ నాయకత్వానికి ప్రశంసలు
ప్రపంచంలోని ప్రధాన ఆర్థిక వ్యవస్థల్లో భారత్ ఒకటని పుతిన్ కొనియాడారు. ప్రస్తుతం భారత్ అత్యధిక ఆర్థిక వృద్ధి రేటును నమోదు చేస్తోందని, ఇది ఊరికే రాలేదని చెప్పారు. మోదీ నాయకత్వంలోని భారత ప్రభుత్వం నిరంతరం చేస్తున్న శ్రమ వల్లే ఈ అద్భుత ఫలితాలు సాధ్యమయ్యాయని ప్రశంసించారు. రాబోయే కొన్ని సంవత్సరాల్లో భారత్-రష్యా మధ్య ద్వైపాక్షిక వాణిజ్యం 100 బిలియన్ డాలర్ల (సుమారు రూ.8.3 లక్షల కోట్లు) మైలురాయిని దాటుతుందని ధీమా వ్యక్తం చేశారు.
అంతర్జాతీయ స్థిరత్వానికే ప్రమాదం
భారత్ ఎప్పుడూ తన సొంత జాతీయ ప్రయోజనాలకే తొలి ప్రాధాన్యం ఇస్తుందని పుతిన్ స్పష్టం చేశారు. అమెరికాతో భారత్ జరుపుతున్న దౌత్యపరమైన చర్చలు.. రష్యాతో ఉన్న కాలపరీక్షకు నిలిచిన బంధాన్ని ఎంతమాత్రం దెబ్బతీయలేవని అన్నారు. తమ ప్రయోజనాల కోసం భారత్ ఏ దేశంతోనైనా సంబంధాలను పెంపొందించుకోవడాన్ని తాము స్వాగతిస్తామన్నారు. రష్యాతో సహకారం విషయంలో పశ్చిమ దేశాలు ఒత్తిడి తెస్తున్న మాట నిజమేనని.. అయితే 150 కోట్ల జనాభా ఉన్న దేశ ప్రధాని మోదీపై ఒత్తిడి తేవడం అంతర్జాతీయ సంబంధాలకు అత్యంత ప్రమాదకరమని అందరూ గ్రహించారని వివరించారు. భారత్ను తాము అత్యంత నమ్మకమైన భాగస్వామిగా భావిస్తున్నట్లు స్పష్టం చేశారు.
