'స్పిరిట్' సెట్స్ నుంచి ప్రభాస్ ఫొటో షేర్ చేసిన స్టైలిస్ట్.. ఇంటర్నెట్‌లో రచ్చ!

పాన్ ఇండియా స్టార్ ప్రభాస్ నటిస్తున్న తాజా చిత్రం 'స్పిరిట్' సెట్స్ నుంచి ఆయన కొత్త లుక్‌కు సంబంధించిన ఓ ఫోటో ఇంటర్నెట్‌లో వైరల్ అవుతోంది. సందీప్ రెడ్డి వంగా దర్శకత్వంలో తెరకెక్కుతున్న ఈ సినిమాపై అంచనాలు భారీగా ఉండగా, ఈ ఫోటో వాటిని మరింత పెంచింది.

వివరాల్లోకి వెళితే, 'స్పిరిట్' చిత్ర బృందంలోని హెయిర్‌స్టైలిస్ట్ ఒకరు తన ఇన్‌స్టాగ్రామ్‌లో ప్రభాస్ ఫోటోను షేర్ చేశారు. ఇందులో ప్రభాస్ ఎంతో స్టైలిష్‌గా బ్లాక్ డ్రెస్‌లో కనిపించారు. అయితే, పోస్ట్ చేసిన కొద్దిసేపటికే ఆ ఫోటోను డిలీట్ చేశారు. కానీ అప్పటికే ఆ ఫోటో స్క్రీన్‌షాట్లు సోషల్ మీడియాలో వైరల్ అయ్యాయి.

నిజానికి ఈ ఫోటో మే 26న తీసిందని తెలిసినప్పటికీ, ప్రస్తుతం ట్రెండింగ్‌లో ఉంది. ఈ కొత్త లుక్‌పై ఫ్యాన్స్ నుంచి భారీ స్పందన వస్తోంది. తమ హీరోను కొత్త అవతార్‌లో చూసి మురిసిపోతూ, వెంటనే సినిమా నుంచి అధికారిక ఫస్ట్ లుక్ పోస్టర్‌ను విడుదల చేయాలని డిమాండ్ చేస్తున్నారు.

ప్రస్తుతం 'స్పిరిట్' సినిమా షూటింగ్ హైదరాబాద్‌లోని విమల్ థియేటర్, బాలానగర్, హైటెక్ సిటీ వంటి ప్రాంతాల్లో శరవేగంగా జరుగుతోంది. 

ఈ యాక్షన్ డ్రామాలో ప్రభాస్ సరసన తృప్తి డిమ్రి హీరోయిన్‌గా నటిస్తుండగా, వివేక్ ఒబెరాయ్ ప్రధాన విలన్‌గా కనిపించనున్నారు. టి-సిరీస్, భద్రకాళి పిక్చర్స్ నిర్మిస్తున్న ఈ చిత్రాన్ని 2027 మార్చి 5న ప్రపంచవ్యాప్తంగా విడుదల చేసేందుకు సన్నాహాలు చేస్తున్నారు.