బరువు తగ్గాలా? ఇంటర్మిటెంట్ ఫాస్టింగ్ vs క్యాలరీల లెక్కింపు.. ఏది బెస్ట్?

బరువు తగ్గడం ఓ పెద్ద టాస్క్. దీని కోసం మార్కెట్లో కీటో, ఎలిమినేషన్ డైట్ లాంటి రకరకాల పద్ధతులు ఉన్నాయి. అయితే వీటిల్లో ‘ఇంటర్మిటెంట్ ఫాస్టింగ్’, ‘క్యాలరీ కౌంటింగ్’ అనే రెండు పద్ధతులు బాగా పాపులర్ అయ్యాయి. మరి ఈ రెండింటిలో ఏది బరువు తగ్గడానికి బాగా పనిచేస్తుంది? సామాన్యులకు ఏది సులువుగా ఉంటుంది? నిపుణులు ఏం చెబుతున్నారో చూద్దాం..

ఇంటర్మిటెంట్ ఫాస్టింగ్ అంటే?
ఇంటర్మిటెంట్ ఫాస్టింగ్ అంటే రోజులో ఒక నిర్దిష్ట సమయంలో మాత్రమే ఆహారం తిని మిగిలిన సమయమంతా ఉపవాసం ఉండటం. ఉదాహరణకు 8 గంటల పాటు తిని మిగిలిన 16 గంటలు ఏమీ తినకుండా ఉండటం. ఇలా తినే సమయాన్ని తగ్గించడం వల్ల నిల్వ ఉన్న కొవ్వును కరిగించి శరీరం శక్తిగా వాడుకుంటుంది.

రోజులో తినే సమయం ఫిక్స్ అవ్వడం వల్ల ఆహారం తీసుకోవడం తగ్గుతుంది. రాత్రి పూట లేట్‌గా స్వీట్లు, నమ్‌కీన్ వంటి స్నాక్స్ తినే అలవాటు తప్పుతుంది. రోజంతా ఏదో ఒకటి తినే అలవాటు తగ్గి, ఇన్సులిన్ స్థాయులు మెరుగవుతాయి. 

అయితే, ఉపవాసం ముగిశాక ఆకలి ఎక్కువై ఒకేసారి అతిగా తినే ప్రమాదం ఉంది. మన భారతీయ కుటుంబాల్లో రాత్రి విందులు, పండుగల సమయంలో ఈ డైట్ పాటించడం చాలా కష్టం.

క్యాలరీల కౌంటింగ్‌ అంటే?
మనం రోజూ తీసుకునే ఆహారంలో ఎన్ని క్యాలరీల శక్తి ఉందో లెక్కబెట్టుకుని తినడాన్ని క్యాలరీ కౌంటింగ్ అంటారు. మనం ఖర్చు చేసే క్యాలరీల కంటే తినే క్యాలరీల శాతం తక్కువగా ఉంటే బరువు తగ్గుతాం.

నచ్చిన ఆహారాన్ని తినే స్వేచ్ఛ ఉంటుంది. ఏ పదార్థాన్నీ మానేయాల్సిన పనిలేదు. తినే క్యాలరీలను కచ్చితంగా తగ్గించడం వల్ల బరువు తగ్గడం చాలా స్పష్టంగా కనిపిస్తుంది. 

అయితే, మన భారతీయ ఇళ్లల్లో వండే కూరలు, గ్రేవీలు, రకరకాల సైజుల్లో ఉండే చపాతీల క్యాలరీలను రోజూ లెక్కించడం చాలా కష్టం. దీనివల్ల కొన్నాళ్లకు విసుగు వచ్చేస్తుంది.

ఏది దేనికి పనికొస్తుంది?
కేవలం బరువు తగ్గడమే లక్ష్యం అయితే ఈ రెండింటిలో ఏ పద్ధతిని కచ్చితంగా పాటించినా మంచి ఫలితాలు ఉంటాయి. క్యాలరీలను లెక్కిస్తూ ప్రోటీన్ ఎక్కువగా ఉండే ఆహారం తీసుకుంటే కండరాలు కరగకుండా బరువు తగ్గుతారు. కేవలం ఉపవాసాలు ఉంటే కండరాల బలం తగ్గే ప్రమాదం ఉంది. ఇంటర్మిటెంట్ ఫాస్టింగ్ వల్ల శరీరంలో ఇన్సులిన్ స్థాయులు ఎక్కువ సమయం తక్కువగా ఉంటాయి. ఇది పొట్ట చుట్టూ పేరుకుపోయిన మొండి కొవ్వును కరిగించడానికి బాగా పనిచేస్తుంది.

మనకు ఏది సెట్ అవుతుంది?
మన భారతీయ ఆహార అలవాట్లలో అన్నం, పనీర్, పప్పులు ఎక్కువగా ఉంటాయి. కాబట్టి ఈ రెండింటినీ కలిపి వాడుకోవడం మనకు ఇంకాస్త సులువుగా ఉంటుంది. అంటే రోజులో 8 గంటల సమయం మాత్రమే తింటూ.. ఆ తినే ఆహారంలో క్యాలరీలను కూడా లెక్కించుకుంటే ఆకలి అదుపులో ఉండి బరువు వేగంగా తగ్గుతారు. అయితే ఎలాంటి డైట్ ప్లాన్ అయినా సరే.. మీ శరీర తీరును బట్టి క్లినికల్ న్యూట్రిషనిస్ట్‌ను సంప్రదించి నిర్ణయం తీసుకోవడం ఉత్తమం.