ఇంట్లో సిగరెట్ కాలుస్తున్నారా?.. మీ పిల్లల ఆరోగ్యం ప్రమాదంలో ఉన్నట్టే!

ఇల్లు... పిల్లలకు అత్యంత సురక్షితమైన ప్రదేశం. తల్లి వంటగదిలో చేసే వంటల సువాసన, పాత సోఫాలో దొరికే వెచ్చదనం, తల్లిదండ్రుల ఆప్యాయత... ఇవన్నీ వారికి భద్రతను ఇస్తాయి. కానీ, అదే ఇంట్లో సిగరెట్ పొగ రూపంలో ఓ నిశ్శబ్ద హంతకి వారి ఆరోగ్యాన్ని కబళిస్తోంది. సిగరెట్ ఆర్పేసినా దాని ప్రభావం గోడలు, కర్టెన్లలో నిలిచిపోయి చిన్నారుల ఊపిరితిత్తులను దెబ్బతీస్తోంది.

భారత్‌లో పొగాకు వాడకం ఇప్పటికీ ఓ పెద్ద సవాలుగా ఉంది. గ్లోబల్ అడల్ట్ టొబాకో సర్వే (GATS-2) ప్రకారం, లక్షలాది మంది భారతీయులు ఇళ్లలో, బహిరంగ ప్రదేశాల్లో ప్యాసివ్ స్మోకింగ్‌కు గురవుతున్నారు. దీనివల్ల తీవ్రంగా నష్టపోతున్నది చిన్నారులే. రాత్రి పూట పిల్లలు దగ్గితే 'బలహీనంగా ఉన్నార'ని, తరచూ ఛాతీ ఇన్ఫెక్షన్లు వస్తే 'వాతావరణం మారడం వల్లే' అని చాలామంది సరిపెట్టుకుంటారు. కానీ, అసలు సమస్య ఇంట్లోనే ఉందని గ్రహించలేకపోతున్నారు.

కనిపించని పొగ... ఊహించని నష్టం
ప్యాసివ్ స్మోకింగ్ అంటే కేవలం పొగ దగ్గర ఉండటం కాదని, పొగతాగని వారు ఇతరులు వదిలిన పొగను పీల్చడమని వైద్య నిపుణులు స్పష్టం చేస్తున్నారు. మరెంగో ఏషియా హాస్పిటల్స్ మెడికల్ ఆంకాలజీ విభాగాధిపతి డాక్టర్ (బ్రిగేడియర్) ఏకే ధర్ మాట్లాడుతూ... "ప్రపంచవ్యాప్తంగా ఏటా 60 లక్షల మంది పొగాకు సంబంధిత కారణాలతో మరణిస్తున్నారు. ఇందులో 50 లక్షల మంది ప్రత్యక్షంగా పొగతాగడం వల్ల చనిపోతుంటే, మరో 5 లక్షల మంది ప్యాసివ్ స్మోకింగ్ వల్ల ప్రాణాలు కోల్పోతున్నారు" అని తెలిపారు. ప్రపంచవ్యాప్తంగా దాదాపు 40 శాతం మంది పిల్లలు ప్యాసివ్ స్మోకింగ్‌కు గురవుతున్నారని ఆయన వివరించారు.

కిటికీ దగ్గర తాగినా ప్రమాదమే!
చాలామంది కిటికీ దగ్గర, బాల్కనీలో లేదా పిల్లలు లేనప్పుడు సిగరెట్ తాగితే ప్రమాదం లేదనుకుంటారు. కానీ అది అపోహ మాత్రమేనని రాజీవ్ గాంధీ క్యాన్సర్ ఇనిస్టిట్యూట్ అండ్ రీసెర్చ్ సెంటర్ కన్సల్టెంట్ డాక్టర్ కపిల్ గోయల్ హెచ్చరించారు. "పొగాకు పొగలోని విషపూరిత కణాలు, క్యాన్సర్ కారకాలు బట్టలు, ఫర్నిచర్, కర్టెన్లు వంటి వాటిపై పేరుకుపోతాయి. వీటిని 'థర్డ్ హ్యాండ్ స్మోక్' అంటారు. నేలపై ఆడుకునే పిల్లలు, వస్తువులను తాకినప్పుడు ఈ రసాయనాలు వారి శరీరంలోకి సులభంగా చేరతాయి" అని ఆయన వివరించారు.

గాలిలో కనిపించే పొగ కన్నా ఇది మరింత ప్రమాదకరమని బీఎల్‌కే మ్యాక్స్ హాస్పిటల్ పల్మనాలజీ విభాగాధిపతి డాక్టర్ సందీప్ నాయర్ తెలిపారు. ఎగ్జాస్ట్ ఫ్యాన్ కింద పొగతాగినా విష కణాలు గదులంతా వ్యాపించి సోఫాలు, పరుపులపై స్థిరపడతాయని, ఆడుకునే క్రమంలో పసిపిల్లలు వాటిని పీల్చడం లేదా మింగడం జరుగుతుందని ఆయన స్పష్టం చేశారు.

పిల్లలపై తీవ్ర ప్రభావం
పిల్లల ఊపిరితిత్తులు ఇంకా అభివృద్ధి చెందుతూ ఉంటాయి. పెద్దలతో పోలిస్తే వారి శ్వాస వేగం ఎక్కువగా ఉండటం వల్ల, శరీర బరువుకు తగినట్లుగా ఎక్కువ విష పదార్థాలను పీలుస్తారు. "పిల్లలు పెద్దలకు చిన్న రూపాలు కాదు. ప్యాసివ్ స్మోకింగ్ వల్ల వారిలో తీవ్రమైన ఆస్తమా, పదేపదే ఛాతీ ఇన్ఫెక్షన్లు, న్యుమోనియా వంటి సమస్యలు వస్తాయి" అని డాక్టర్ సందీప్ నాయర్ హెచ్చరించారు.

భారతీయ ఇళ్లలో ఇరుకైన గదులు, సరైన వెంటిలేషన్ లేకపోవడం వల్ల ఈ సమస్య మరింత తీవ్రంగా ఉంటుంది. పెద్దలను గౌరవించే సంప్రదాయం కారణంగా, ఇంట్లో పొగతాగే వారిని ఎవరూ ప్రశ్నించలేని పరిస్థితి ఉంటుంది. పిల్లల పోషణ, చదువుల కోసం వేలకు వేలు ఖర్చుపెట్టే కుటుంబాలు, తెలియకుండానే రోజూ వారిని పొగాకు విషానికి గురిచేస్తున్నాయి.

పరిష్కారం ఒక్కటే... పొగ రహిత ఇల్లు
ప్యాసివ్ స్మోకింగ్ నివారణకు పాక్షిక చర్యలు పనిచేయవని నిపుణులు తేల్చిచెబుతున్నారు. ఎయిర్ ఫ్రెషనర్లు విష రసాయనాలను తొలగించలేవు. ఫ్యాన్లు పొగను ఒకచోటి నుంచి మరోచోటికి వ్యాపింపజేస్తాయి. అందుకే ఇంటిని, కారును పూర్తిగా పొగ రహిత ప్రదేశాలుగా మార్చడమే ఏకైక పరిష్కారం. ఇంట్లో ఎవరూ పొగతాగకుండా చూడటం, పొగతాగే అలవాటు ఉన్నవారు దాన్ని మానేయడానికి సహాయం కోరడం చాలా ముఖ్యం. ఎందుకంటే, పిల్లలు తాము పీల్చే గాలిని ఎంచుకోలేరు. పెద్దలే వారి కోసం దాన్ని ఎంపిక చేస్తారు.