కోలీవుడ్ కు సీఎం విజయ్ భరోసా.. కొత్త సినిమాలకు రోజుకు 5 షోలు!

తమిళనాడు ముఖ్యమంత్రి విజయ్ చిత్ర పరిశ్రమకు అనుకూలంగా ఓ కీలక నిర్ణయం తీసుకున్నారు. రాష్ట్రంలో విడుదలయ్యే కొత్త తమిళ చిత్రాలు మొదటి ఏడు రోజుల పాటు రోజుకు ఐదు షోలు ప్రదర్శించుకోవడానికి అనుమతిస్తూ ఆయన ప్రభుత్వం ఉత్తర్వులు జారీ చేసింది. ఈ నిర్ణయం కోలీవుడ్ వర్గాలకు పెద్ద ఊరటనిచ్చింది.

సోమవారం జరిగిన కేబినెట్ సమావేశంలో ఈ నిర్ణయం తీసుకున్నారు. ఇప్పటివరకు, సాధారణ ప్రదర్శనల కంటే అదనపు షోలు వేయాలంటే నిర్మాతలు, పంపిణీదారులు ముందుగా ప్రభుత్వ అనుమతి తీసుకోవాల్సి ఉండేది. ఈ ప్రక్రియ చాలా సమయంతో కూడుకున్నది కావడంతో పరిశ్రమ వర్గాలు ఇబ్బందులు ఎదుర్కొనేవి. తాజా నిర్ణయంతో, సినిమా విడుదలైన తొలి వారం అదనపు షోల కోసం ఎలాంటి ముందస్తు అనుమతి అవసరం లేదు. థియేటర్ యజమానులు, నిర్మాతలు, పంపిణీదారులే ఈ విషయంలో నిర్ణయం తీసుకోవచ్చు.

ఒక నటుడిగా చిత్ర పరిశ్రమలోని సమస్యలను క్షుణ్ణంగా అర్థం చేసుకున్న విజయ్, ముఖ్యమంత్రిగా బాధ్యతలు స్వీకరించిన తర్వాత ఈ నిర్ణయం తీసుకోవడం ప్రాధాన్యం సంతరించుకుంది. సినిమా విడుదలైన మొదటి వారంలోనే అత్యధిక వసూళ్లు రాబట్టేందుకు ఇది దోహదపడుతుందని పరిశ్రమ వర్గాలు భావిస్తున్నాయి.

ఇదే సమావేశంలో, చిన్న, సన్నకారు రైతులకు రూ.50,000 వరకు వ్యవసాయ రుణాలను మాఫీ చేస్తున్నట్లు ప్రభుత్వం ప్రకటించింది. దీనివల్ల దాదాపు 14.22 లక్షల మంది రైతులకు లబ్ధి చేకూరనుంది. అలాగే, ఓ పోక్సో కేసులో నిందితులకు త్వరితగతిన డబుల్ మరణశిక్ష పడటంపై కేబినెట్ సంతృప్తి వ్యక్తం చేసింది.