నారింజ తొక్కలతో యువతి అద్భుత ఆవిష్కరణ.. ఇప్పటికీ స్ఫూర్తిదాయకం!

దశాబ్దం క్రితం దక్షిణాఫ్రికాకు చెందిన కియారా నిర్ఘిన్ అనే ఓ టీనేజ్ యువతి చేసిన అద్భుత ఆవిష్కరణ నేటికీ ఎంతోమందికి స్ఫూర్తినిస్తోంది. తీవ్రమైన కరువుతో అల్లాడుతున్న తన దేశంలోని రైతులకు అండగా నిలవాలన్న ఆలోచనతో, పారేసే నారింజ తొక్కలను ఉపయోగించి ఓ వినూత్న పరిష్కారం కనుగొన్నారు.

ఆ సమయంలో దక్షిణాఫ్రికా తీవ్ర నీటి ఎద్దడిని ఎదుర్కొంటోంది. ఈ సమస్యకు పరిష్కారం కనుగొనే ప్రయత్నంలో కియారా, నారింజ మరియు అవకాడో పండ్ల తొక్కల నుంచి తక్కువ ఖర్చుతో ఒక సూపర్ అబ్సార్బెంట్ హైడ్రోజెల్‌ను అభివృద్ధి చేశారు. ఇది పర్యావరణంలో సులభంగా కలిసిపోయే (బయోడీగ్రేడబుల్) గుణం కలిగి ఉండటం దీని ప్రత్యేకత. ఈ హైడ్రోజెల్ నేలలో ఒక చిన్న స్పాంజిలా పనిచేస్తుంది. దీన్ని వర్షంలో తడిపినప్పుడు లేదా నీటిని అందించినప్పుడు తన బరువు కన్నా వందల రెట్ల నీటిని పీల్చుకుని, నెమ్మదిగా మొక్కల వేర్లకు అందిస్తుంది. దీనివల్ల నేలలో తేమ ఎక్కువ కాలం నిలిచి ఉండి, పంటలు ఎండిపోకుండా ఉంటాయి.

కియారా చేసిన ఈ అద్భుత ఆవిష్కరణకు ప్రపంచవ్యాప్తంగా గుర్తింపు లభించింది. 2016లో జరిగిన గూగుల్ సైన్స్ ఫెయిర్ పోటీల్లో ఆమె ఏకంగా గ్రాండ్ ప్రైజ్ గెలుచుకున్నారు. బహుమతి కింద 50,000 డాలర్ల స్కాలర్‌షిప్‌ను కూడా అందుకున్నారు.

ఈ సంఘటన జరిగి పదేళ్లు గడిచిన నేపథ్యంలో, కియారా నిర్ఘిన్ ఇప్పుడు టెక్నాలజీ రంగంలో తనదైన ముద్ర వేస్తున్నారు. స్టాన్‌ఫోర్డ్ యూనివర్సిటీలో ఉన్నత విద్య పూర్తిచేసి, ప్రస్తుతం 'చిమా' అనే ఆర్టిఫిషియల్ ఇంటెలిజెన్స్ (ఏఐ) స్టార్టప్‌కు సహ వ్యవస్థాపకురాలిగా రాణిస్తున్నారు. వ్యర్థ పదార్థాలతో యువత ఎలాంటి అద్భుతాలు చేయగలరో చెప్పడానికి కియారా ప్రయోగం నేటికీ ఒక బలమైన ఉదాహరణగా నిలుస్తోంది.