పాస్టర్ చింతాడ ఆనంద్‌ ఎస్సీ సర్టిఫికెట్ రద్దు.. బాపట్ల కలెక్టర్ ఉత్తర్వులు

బాపట్ల జిల్లాకు చెందిన పాస్టర్ చింతాడ ఆనంద్‌కు జారీ చేసిన షెడ్యూల్డ్ కులాల (ఎస్సీ) సర్టిఫికెట్‌ను రద్దు చేస్తూ జిల్లా యంత్రాంగం కీలక నిర్ణయం తీసుకుంది. ఆయన క్రైస్తవ మతాన్ని స్వీకరించి, పాటిస్తున్నట్లు విచారణలో నిర్ధారణ కావడంతో బాపట్ల జిల్లా కలెక్టర్ వి. వినోద్ కుమార్ ఈ మేరకు ఉత్తర్వులు జారీ చేశారు. సర్టిఫికెట్ రద్దుకు సంబంధించి గెజిట్ నోటిఫికేషన్ కూడా విడుదల చేశారు.

ఈ వివాదం పిట్టలవానిపాలెం మండలం కొత్తపాలెం గ్రామానికి చెందిన అక్కల రామిరెడ్డి చేసిన ఫిర్యాదుతో మొదలైంది. గతంలో తనపై చింతాడ ఆనంద్‌ ఎస్సీ, ఎస్టీ అట్రాసిటీ కేసు పెట్టడాన్ని రామిరెడ్డి హైకోర్టులో సవాల్ చేశారు. క్రైస్తవ పాస్టర్‌గా ఉన్న ఆనంద్‌కు ఎస్సీ చట్టం వర్తించదని వాదించారు. హైకోర్టు రామిరెడ్డికి అనుకూలంగా తీర్పు ఇవ్వగా, ఆనంద్‌ సుప్రీంకోర్టును ఆశ్రయించారు. ఈ కేసులో 2026 మార్చి 24న సుప్రీంకోర్టు కీలక తీర్పు వెలువరించింది. హిందూ, సిక్కు, బౌద్ధ మతాలను కాకుండా ఇతర మతాలను స్వీకరించిన వారు షెడ్యూల్డ్ కులాల కిందకు రారని స్పష్టం చేసింది.

సుప్రీంకోర్టు ఆదేశాల మేరకు జిల్లా స్థాయి పరిశీలన కమిటీ నివేదిక ఆధారంగా కలెక్టర్ తుది నిర్ణయం తీసుకున్నారు. ఈ ఉత్తర్వులపై అప్పీల్ చేసుకునేందుకు చింతాడ ఆనంద్‌కు 30 రోజుల గడువు ఇచ్చారు.

ఈ నిర్ణయంపై చింతాడ ఆనంద్‌ స్పందిస్తూ, "నేను ఎస్సీగా పుట్టాను. క్రైస్తవాన్ని విశ్వసించాను కానీ కులాన్ని మార్చుకోలేదు. ఎస్సీ హోదా కోసం పోరాటాన్ని కొనసాగిస్తాను," అని తెలిపారు. మరోవైపు ఫిర్యాదుదారుడైన అక్కల రామిరెడ్డి, "వైసీపీ ప్రభుత్వంలో నాపై అక్రమంగా అట్రాసిటీ కేసు పెట్టి వేధించారు. న్యాయపోరాటం చేసి గెలిచాను. కలెక్టర్ నిర్ణయం హర్షణీయం," అని అన్నారు.