ట్విష శర్మ మృతి కేసు... సుమోటోగా స్వీకరించిన సుప్రీం కోర్టు

మాజీ మోడల్, నటి ట్విష శర్మ (33) అనుమానాస్పద మృతి కేసులో కీలక పరిణామం చోటుచేసుకుంది. ఈ కేసు దర్యాప్తులో సంస్థాగత పక్షపాతం, విధానపరమైన లోపాలు ఉన్నాయన్న ఆరోపణల నేపథ్యంలో సుప్రీంకోర్టు దీనిని సుమోటోగా విచారణకు స్వీకరించింది. ఈ మేరకు శనివారం కేసు నమోదు చేసిన సర్వోన్నత న్యాయస్థానం, మే 25న విచారణ జరపనున్నట్లు ప్రకటించింది.

సుప్రీంకోర్టు ప్రధాన న్యాయమూర్తి జస్టిస్ సూర్యకాంత్, జస్టిస్‌లు జాయ్ మాల్యా బాగ్చీ, విపుల్ ఎం పంచోలిలతో కూడిన ధర్మాసనం ఈ కేసును విచారించనుంది. "అత్తింటిలో యువతి అనుమానాస్పద మృతి కేసులో సంస్థాగత పక్షపాతం, దర్యాప్తు లోపాలపై" అనే పేరుతో ఈ కేసును నమోదు చేశారు.

మధ్యప్రదేశ్‌లోని భోపాల్‌లో గల కటారా హిల్స్ ప్రాంతంలోని అత్తింటిలో మే 12న ట్విష శర్మ ఉరివేసుకుని కనిపించిన విషయం తెలిసిందే. వివాహమైన ఐదు నెలలకే ఆమె మృతి చెందడంతో, వరకట్న వేధింపుల వల్లే ఆమె ఆత్మహత్య చేసుకుందని కుటుంబ సభ్యులు ఆరోపిస్తున్నారు. ఈ మేరకు ఆమె భర్త సమర్థ్ సింగ్, అత్త గిరిబాల సింగ్‌పై పోలీసులు ఎఫ్ఐఆర్ నమోదు చేశారు.

నిందితుడైన భర్త సమర్థ్ సింగ్, వృత్తిరీత్యా న్యాయవాది. జబల్‌పూర్ కోర్టులో లొంగిపోవడానికి ప్రయత్నిస్తుండగా పోలీసులు శుక్రవారం అతడిని అరెస్ట్ చేశారు. భోపాల్ కోర్టు అతనికి ఏడు రోజుల పోలీస్ కస్టడీ విధించింది. మరో నిందితురాలైన అత్త గిరిబాల సింగ్ మాజీ జిల్లా జడ్జి కాగా, ప్రస్తుతం భోపాల్ జిల్లా వినియోగదారుల కోర్టు చైర్‌పర్సన్‌గా పనిచేస్తున్నారు. ఈ నేపథ్యంలోనే దర్యాప్తు ప్రభావితమవుతోందన్న ఆందోళనలు వ్యక్తమయ్యాయి.

ఇప్పటికే ఈ కేసుపై మధ్యప్రదేశ్ ప్రభుత్వం సీబీఐ దర్యాప్తునకు సిఫార్సు చేసింది. అలాగే, మధ్యప్రదేశ్ హైకోర్టు ఆదేశాల మేరకు ఢిల్లీ ఎయిమ్స్ వైద్యుల బృందంతో రెండోసారి పోస్టుమార్టం నిర్వహించడానికి ఏర్పాట్లు జరుగుతున్నాయి. సుప్రీంకోర్టు రంగంలోకి దిగడంతో ఈ కేసు దర్యాప్తు మరింత పారదర్శకంగా, వేగవంతంగా జరుగుతుందని భావిస్తున్నారు.