మీ ఆయుష్షు పెరగడానికి రోజుకు 5 నిమిషాలు చాలు!

వ్యాయామం చేయడానికి సమయం లేదని బాధపడేవారికి ఇది శుభవార్త. రోజూ కేవలం 5 నిమిషాల పాటు చేసే తేలికపాటి వ్యాయామం కూడా మిమ్మల్ని ఆరోగ్యంగా, దీర్ఘాయువులుగా ఉంచగలదు. ఈ చిన్నపాటి శారీరక శ్రమతో దాదాపు 10 శాతం అకాల మరణాలను నివారించవచ్చని, తద్వారా లక్షలాది మంది జీవితకాలాన్ని పెంచవచ్చని ఓ కొత్త అధ్యయనం తేల్చి చెప్పింది. 

యూకే, యూఎస్, స్కాండినేవియా దేశాల్లోని 1.5 లక్షల మంది పెద్దల ఆరోగ్య డేటాను విశ్లేషించి ఈ నిర్ధారణకు వచ్చారు. నార్వేజియన్ స్కూల్ ఆఫ్ స్పోర్ట్ ప్రొఫెసర్ ఉల్ఫ్ ఎకెలుండ్ నేతృత్వంలోని పరిశోధనలో ఈ విషయం స్పష్టమైంది. వేగంగా నడవడం, సైకిల్ తొక్కడం, మెట్లు ఎక్కడం వంటి మధ్యస్థ వ్యాయామాలు రోజుకు ఐదు నిమిషాలు చేసినా, అకాల మరణాల ముప్పు గణనీయంగా తగ్గినట్లు వారు గుర్తించారు.

దీన్నే నిపుణులు 'ఎక్సర్‌సైజ్ స్నాకింగ్'గా పిలుస్తున్నారు. అంటే రోజంతా చిన్న చిన్న విరామాల్లో శారీరక శ్రమ చేయడం. వంటింట్లో పాటలకు డ్యాన్స్ చేయడం, వేగంగా ఇల్లు శుభ్రం చేయడం వంటివి కూడా ఈ కోవలోకే వస్తాయి. కేవలం వ్యాయామమే కాదు, రోజులో ఎక్కువసేపు కూర్చునే సమయాన్ని 30 నిమిషాలు తగ్గించుకున్నా మరణాల ముప్పు 7 శాతం వరకు తగ్గుతుందని అధ్యయనం పేర్కొంది.

ఏమీ చేయకపోవడం కంటే ఏదో ఒక చిన్న వ్యాయామం చేయడం ఎంతో మేలని ఈ పరిశోధన స్పష్టం చేస్తోంది. ప్రపంచ ఆరోగ్య సంస్థ సూచించినట్లు వారానికి 150 నిమిషాల వ్యాయామం లక్ష్యంగా పెట్టుకోలేని వారు కూడా, ఇలాంటి చిన్న చిన్న మార్పులతో తమ ఆరోగ్యాన్ని, ఆయుష్షును మెరుగుపరుచుకోవచ్చు.