ఇమ్రాన్ ఖాన్ గద్దె దిగడం వెనుక అమెరికా హస్తం? రహస్య పత్రాల లీక్‌

పాకిస్థాన్‌ మాజీ ప్రధాని ఇమ్రాన్ ఖాన్‌ను పదవి నుంచి దించేయడం వెనుక అమెరికా హస్తం ఉందంటూ ఆరోపిస్తున్న ఓ రహస్య దౌత్య పత్రం లీకైంది. అమెరికాకు చెందిన ‘డ్రాప్ సైట్’ అనే పరిశోధక వార్తా సంస్థ ఈ పత్రాల పూర్తి సారాంశాన్ని బయటపెట్టింది. ఇమ్రాన్ ఖాన్ ప్రభుత్వం విశ్వాస పరీక్షలో కూలిపోవడానికి సరిగ్గా నెల ముందు.. అంటే 2022 మార్చిలో అమెరికా అధికారి డోనాల్డ్ లూ, అప్పటి అమెరికాలోని పాక్ రాయబారి అసద్ మజీద్ ఖాన్ మధ్య జరిగిన సంభాషణలు ఈ పత్రంలో ఉన్నాయి.

ఉక్రెయిన్ సంక్షోభం విషయంలో పాకిస్థాన్‌ తటస్థంగా ఉండటాన్ని అమెరికా తీవ్రంగా తప్పుబట్టినట్లు ఈ పత్రాల ద్వారా తెలుస్తోంది. ఇమ్రాన్ ఖాన్ రష్యా పర్యటనను ఆయన సొంత నిర్ణయంగానే అమెరికా చూసిందని డోనాల్డ్ లూ పేర్కొన్నారు. ‘‘ఒకవేళ ప్రధానిపై ప్రవేశపెట్టిన అవిశ్వాస తీర్మానం నెగ్గితే.. వాషింగ్టన్ అంతా మర్చిపోతుంది. లేదంటే పాకిస్థాన్‌కు ముందు ముందు రోజులు చాలా కష్టంగా ఉంటాయి’’ అని అమెరికా అధికారి హెచ్చరించినట్లు ఆ పత్రాల్లో ఉంది. అంతేగాక ఇమ్రాన్ ఖాన్ పదవిలో ఉంటే పాక్‌ను అమెరికా, యూరప్‌ పూర్తిగా దూరం పెడతాయని కూడా ఆయన పేర్కొన్నారు.

అయితే ఇమ్రాన్ ఖాన్ రష్యా పర్యటన ఉక్రెయిన్‌పై దాడికి మద్దతు ఇవ్వడానికి కాదని, అది కేవలం రెండు దేశాల ద్వైపాక్షిక సంబంధాల కోసమేనని పాక్ రాయబారి నచ్చజెప్పే ప్రయత్నం చేశారు. ఈ పర్యటన ఉక్రెయిన్‌పై దాడికి ముందే ఖరారైందని, రష్యా వెళ్లినందుకు ఇమ్రాన్ ఖాన్ కూడా విచారం వ్యక్తం చేశారని రాయబారి వివరించారు. ఉక్రెయిన్ విషయంలో భారత్ కూడా ఓటింగ్‌కు దూరంగా ఉన్నప్పుడు.. పాకిస్థాన్‌ను మాత్రమే అమెరికా ఎందుకు తప్పుబడుతోందని ఆయన ప్రశ్నించారు. తనను పదవి నుంచి దించడానికి అమెరికా కుట్ర చేస్తోందని అప్పట్లో ఇమ్రాన్ ఖాన్ చేసిన ఆరోపణలను అగ్రరాజ్యం కొట్టిపారేసింది. ప్రస్తుతం ఇమ్రాన్ ఖాన్ పాకిస్థాన్‌లోని అడియాలా జైలులో ఉన్నారు.