చెలరేగిన రాజస్థాన్ టాపార్డర్.. ఢిల్లీ టార్గెట్ 194

ఢిల్లీలోని అరుణ్ జైట్లీ స్టేడియంలో రాజస్థాన్ రాయల్స్ టాపార్డర్ చలవతో భారీ స్కోరు సాధించింది. ఢిల్లీ క్యాపిటల్స్‌తో జరుగుతున్న ఈ మ్యాచ్‌లో టాస్ ఓడి తొలుత బ్యాటింగ్ చేసిన రాజస్థాన్, నిర్ణీత 20 ఓవర్లలో 8 వికెట్ల నష్టానికి 193 పరుగులు నమోదు చేసింది. 

రాజస్థాన్ ఇన్నింగ్స్‌లో కెప్టెన్ రియాన్ పరాగ్ (26 బంతుల్లో 51), ధ్రువ్ జురెల్ (40 బంతుల్లో 53) హాఫ్ సెంచరీలతో చెలరేగారు. ముఖ్యంగా పరాగ్ తన ఇన్నింగ్స్‌లో 3 ఫోర్లు, 5 సిక్సర్లతో ఢిల్లీ బౌలర్లపై విరుచుకుపడ్డాడు. ఆరంభంలో యువ బ్యాటర్ వైభవ్ సూర్యవంశీ కేవలం 21 బంతుల్లో 5 ఫోర్లు, 3 సిక్సర్లతో 46 పరుగులు చేసి అద్భుతమైన ఆరంభాన్ని ఇచ్చాడు. ఈ ముగ్గురి దూకుడుతో రాజస్థాన్ స్కోరు బోర్డు పరుగులు పెట్టింది.

ఢిల్లీ బౌలర్లలో మిచెల్ స్టార్క్ 4 వికెట్లు పడగొట్టినప్పటికీ, 40 పరుగులు సమర్పించుకుని ఖరీదైన బౌలర్‌గా నిలిచాడు. అయితే ఒకే ఓవర్లో రెండు కీలక వికెట్లు తీసి రాజస్థాన్ జోరుకు కొంత బ్రేక్ వేశాడు. లుంగి ఎంగిడి (2/24), మాధవ్ తివారీ (2/27) పొదుపుగా బౌలింగ్ చేసి ఆకట్టుకున్నారు. అంతకుముందు టాస్ గెలిచిన ఢిల్లీ కెప్టెన్ అక్షర్ పటేల్ ఫీల్డింగ్ ఎంచుకున్నాడు. సొంత మైదానంలో ఈ భారీ లక్ష్యాన్ని ఢిల్లీ ఎలా ఛేదిస్తుందో వేచి చూడాలి.