నుదుటి నుంచి మెడ వరకు.. తలనొప్పికి కారణాలు ఇవే!

మనలో చాలా మందికి తలనొప్పి అనేది ఒక సాధారణ సమస్య. కాస్త పని ఒత్తిడి, నిద్రలేమి లేదా అలసటగా ఉన్నప్పుడు తలనొప్పి రావడం సహజమే. అయితే, ప్రతిసారీ దానిని తేలిగ్గా తీసుకుని, ఏదో ఒక మాత్ర వేసుకుని సరిపెట్టుకోవడం సరైన పద్ధతి కాదు. తలనొప్పి ఏ ప్రదేశంలో వస్తుందనే దానిపై ఆధారపడి దాని వెనుక ఉన్న ఆరోగ్య కారణాన్ని అంచనా వేయవచ్చని నిపుణులు చెబుతున్నారు. ఈ సంకేతాలను అర్థం చేసుకోవడం ద్వారా, మనం మన ఆరోగ్యం పట్ల మరింత శ్రద్ధ వహించే అవకాశం ఉంటుంది.

సాధారణంగా నుదుటి భాగంలో వచ్చే నొప్పికి మానసిక ఒత్తిడి లేదా సైనస్ సమస్య పెరగడం కారణం కావచ్చు. అదే కణతల వద్ద నొప్పి వస్తుంటే, అది టెన్షన్, డీహైడ్రేషన్ (శరీరంలో నీటిశాతం తగ్గడం) లేదా నిద్రలో పళ్ళు కొరికే అలవాటుకు సంకేతం కావచ్చు. చాలామందిని ఇబ్బంది పెట్టే మరో సమస్య కళ్ల వెనుక నొప్పి. ఇది అధిక కంటి ఒత్తిడి, గ్లాకోమా లేదా కెఫిన్ అధికంగా తీసుకుని మానేయడం వల్ల వచ్చే లక్షణాల్లో ఒకటిగా పరిగణిస్తారు.

ముక్కు, బుగ్గల చుట్టూ నొప్పిగా ఉంటే అది సైనస్ ఇన్ఫెక్షన్, అలర్జీలు లేదా జలుబు వల్ల కావొచ్చు. ఇక తలకు కేవలం ఒకవైపు మాత్రమే తీవ్రమైన నొప్పి వస్తుంటే, దానిని మైగ్రేన్ లేదా క్లస్టర్ తలనొప్పిగా అనుమానించాలి. కొందరికి తల పైభాగంలో నొప్పి వస్తుంది. దీనికి కండరాల ఒత్తిడి, డీహైడ్రేషన్ లేదా ఎక్కువ సేపు సరైన భంగిమలో కూర్చోకపోవడం కారణాలుగా ఉంటాయి. దవడ భాగంలో నొప్పి వస్తే టీఎంజే రుగ్మత, పళ్లు కొరకడం లేదా సైనస్ ఇన్ఫెక్షన్ కారణమై ఉండొచ్చు.

తల వెనుక భాగం, మెడ, తల కింది భాగంలో నొప్పి వస్తుంటే దానికి ఆర్థరైటిస్, ఎక్కువ సేపు తల వంచి పనిచేయడం వల్ల నరాలపై ఒత్తిడి లేదా సెర్వికోజెనిక్ తలనొప్పి కారణం కావచ్చు. ఈ లక్షణాలు కేవలం ప్రాథమిక అవగాహన కోసం మాత్రమే. తలనొప్పి తరచుగా వస్తున్నా, నొప్పి తీవ్రత ఎక్కువగా ఉన్నా వెంటనే వైద్యుడిని సంప్రదించి సరైన కారణం తెలుసుకోవడం చాలా ముఖ్యం.