అదే నిజమైతే హార్దిక్ పాండ్యాను జట్టు నుంచి తప్పించాలి: సెహ్వాగ్

ముంబై ఇండియన్స్ డ్రెస్సింగ్ రూమ్‌లో వాతావరణం సరిగా లేదంటూ వస్తున్న పుకార్లు గనుక నిజమైతే, కెప్టెన్ హార్దిక్ పాండ్యాను ఫ్రాంచైజీ విడుదల చేయడమే మంచిదని భారత మాజీ ఓపెనర్ వీరేంద్ర సెహ్వాగ్ అభిప్రాయపడ్డాడు. ఆటగాడిగా హార్దిక్ అత్యుత్తమమైనప్పటికీ, జట్టులో సమస్యలుంటే మాత్రం కఠిన నిర్ణయం తీసుకోవాలని సూచించారు.

ఐపీఎల్ 2026 సీజన్‌లో భాగంగా నిన్న పంజాబ్ కింగ్స్‌తో జరిగిన మ్యాచ్‌లో ముంబై ఇండియన్స్ విజయం సాధించింది. అయితే ఈ మ్యాచ్‌కు కెప్టెన్ హార్దిక్ పాండ్యా దూరంగా ఉన్నాడు. వీపు నొప్పితో (బ్యాక్ స్పాజం) అతను ఆడలేదని జట్టు యాజమాన్యం ప్రకటించగా, జస్‌ప్రీత్ బుమ్రా కెప్టెన్సీ బాధ్యతలు చేపట్టాడు. అయితే, జట్టులో అంతర్గత విభేదాలు ఉన్నాయని, అందుకే హార్దిక్ ఆడలేదనే పుకార్లు బలంగా వినిపిస్తున్నాయి. ఈ నేపథ్యంలో క్రిక్‌బజ్ చర్చా కార్యక్రమంలో సెహ్వాగ్ మాట్లాడాడు.

“కేవలం క్రికెట్ ప్రదర్శనను చూస్తే హార్దిక్‌ను అట్టిపెట్టుకోవాలి. కానీ డ్రెస్సింగ్ రూమ్‌లో ఉద్రిక్త వాతావరణం లేదా ఇతర సమస్యలు ఉన్నాయని వస్తున్న పుకార్లు నిజమైతే, అతడిని జట్టు నుంచి విడుదల చేయాలి. అవేవీ లేకపోతే మాత్రం కచ్చితంగా రిటైన్ చేసుకోవాలి. ఎందుకంటే అతను ఒక టాప్ క్వాలిటీ ప్లేయర్” అని సెహ్వాగ్ స్పష్టం చేశాడు.

పుకార్లను పక్కనపెడితే, ఒక ఆటగాడిగా హార్దిక్ జట్టుకు చాలా విలువైనవాడని, అతడిని అట్టిపెట్టుకోవాలని తాను భావిస్తున్నట్లు సెహ్వాగ్ తెలిపాడు. ప్రస్తుత ఐపీఎల్‌లో రిషభ్ పంత్ అత్యధికంగా రూ. 27 కోట్లు అందుకుంటున్నాడని, హార్దిక్ వాస్తవ విలువ కూడా అంతే స్థాయిలో ఉంటుందని అన్నారు. ముంబై ఇండియన్స్ ఈ సీజన్‌లో ఇంకా రెండు మ్యాచ్‌లు ఆడాల్సి ఉండగా, వాటిలో హార్దిక్ ఆడతాడా లేదా అన్నది ఆసక్తికరంగా మారింది.