ఇలాంటి జీవితాన్ని వదిలి విదేశాలకు వెళతారా?.. ఎన్నారై యువకుడి ఎమోష‌న‌ల్‌ వీడియో వైర‌ల్‌!

లండన్‌లో మంచి ఉద్యోగం, ఆధునిక జీవనశైలి ఉన్నప్పటికీ.. పుట్టిన ఊరు, అక్కడి ప్రశాంత వాతావరణం ఇచ్చే అనుభూతి ముందు అన్నీ దిగదుడుపే. ఇదే విషయాన్ని తన ఇన్‌స్టాగ్రామ్ వీడియో ద్వారా ప్రపంచానికి తెలియజేశాడు 25 ఏళ్ల విష్ణు విజయధరన్. యూకేలో నివసిస్తున్న ఈ కంటెంట్ క్రియేటర్, మే 2న పోస్ట్ చేసిన వీడియో ఇప్పుడు సోషల్ మీడియాలో ఎంతోమందిని ఆకట్టుకుంటోంది. లండన్‌లోని హడావుడి జీవితానికి, కేరళలోని తన పల్లెటూరి ప్రశాంత జీవనానికి మధ్య ఉన్న తేడాను కళ్లకు కట్టినట్టు చూపించాడు.

పొలాల మధ్యలో ఇల్లు.. ఇంట్లోనే పంటలు
"మా ఇల్లు వరి పొలాల మధ్యలో ఉంటుంది" అంటూ కేరళ సహజ అందాలను ఏరియల్ షాట్స్‌తో బంధించి తన వీడియోను ప్రారంభించాడు విష్ణు. తమ కుటుంబం దాదాపుగా అన్ని రకాల ఆహార పదార్థాలను సొంతంగానే పండించుకుంటుందని వివరించాడు. అరటిపండ్లు, అవకాడోలు, పనస పండ్లు, ఆరు రకాల మామిడి పండ్లు, స్టార్ ఫ్రూట్స్ వంటి ఎన్నో రకాలు తమ పెరట్లోనే పండుతాయని చూపించాడు. 

సంప్రదాయ రుచులు.. పల్లెటూరి సరదాలు
విష్ణు తన సొంతూరి పర్యటనలో ఆహారానికి పెద్దపీట వేశాడు. తనకు ఇష్టమైన సంప్రదాయ అల్పాహారం గంజి-పప్పు (రైస్ పోరిడ్జ్, పెసరపప్పు)తో పాటు ఇంటికే డెలివరీ అయిన తాజా ఆల్చిప్పలు, పీతలతో తన తల్లి వండిన అచ్చమైన కేరళ భోజనాన్ని ఫాలోవర్స్‌కు చూపించాడు. ఆహారం మాత్రమే కాకుండా స్నేహితులతో కలిసి చెరువులో ఈత కొట్టడం, వందల ఏళ్ల నాటి తమ పూర్వీకుల ఇళ్లను సందర్శించడం వంటి పల్లెటూరి సరదాలను కూడా పంచుకున్నాడు. కొన్ని పాత ఇళ్లలో రహస్య నేలమాళిగలు కూడా ఉన్నాయని పేర్కొన్నాడు.

ఇలాంటి జీవితాన్ని వదిలి వెళతారా?
ఈ వీడియో కేవలం ఒక ట్రావెల్ వ్లాగ్ మాత్రమే కాదు, విదేశాలకు వలస వెళ్లిన వారి మానసిక సంఘర్షణకు అద్దం పడుతుంది. తన ఊరిలో జరుగుతున్న ఒక ఉత్సవాన్ని చూపిస్తూ, విష్ణు భావోద్వేగంతో ఒక ప్రశ్న సంధించాడు. "నిజాయతీగా చెప్పండి, ఇలాంటి జీవితాన్ని వదిలి ఎవరైనా విదేశాలకు వెళ్లగలరా? ఎందుకంటే నేను అలా వెళ్లినందుకు ఇప్పుడు త‌ప్పు చేశాన‌నే భావన‌తో ఉన్నాను" అని పేర్కొన్నాడు. కుటుంబంతో ప్రశాంతంగా గడుపుతున్న క్షణాలను చూపిస్తూ వీడియోను ముగించాడు. 

లండన్ వంటి నగరాల్లో కెరీర్ కోసం వెళ్లిన ఎంతోమంది యువత.. తాము ఏం కోల్పోతున్నారో ఈ వీడియో గుర్తుచేస్తోంది. విష్ణుకు కేరళలోని కొబ్బరి చెట్లు, పచ్చని పొలాలు కేవలం సెలవు గడిపే ప్రదేశాలు కాదు, తిరిగి ఇంటికి రావడానికి ప్రేరేపించే ఆత్మబంధువులు.