ఝార్ఖండ్‌లో దారుణం.. నాలుగేళ్ల చిన్నారిపై వృద్ధుడి అఘాయిత్యం

ఝార్ఖండ్‌లోని పలామూ జిల్లాలో దారుణ ఘటన చోటుచేసుకుంది. నాలుగేళ్ల చిన్నారిపై లైంగిక దాడికి పాల్పడ్డాడన్న ఆరోపణలతో 68 ఏళ్ల వృద్ధుడిని పోలీసులు అరెస్ట్ చేశారు. ఈ ఘటనపై స్థానికంగా తీవ్ర ఆగ్రహం వ్యక్తమవుతోంది. నిందితుడిని కఠినంగా శిక్షించాలంటూ స్థానికులు పెద్ద ఎత్తున నిరసనలకు దిగారు.

పోలీసులు తెలిపిన వివరాల ప్రకారం విద్యా సావ్ (68) అనే వ్యక్తి ఏప్రిల్ 30న బాలికను తన ఇంట్లోకి తీసుకెళ్లి లైంగిక దాడికి పాల్పడ్డాడు. అయితే, గురువారం మరోసారి ఆ చిన్నారికి చాక్లెట్లు ఆశచూపి తన ఇంటికి తీసుకెళ్లేందుకు ప్రయత్నించాడు. దీంతో భయపడిపోయిన బాలిక, గతంలో జరిగిన అఘాయిత్యం గురించి తన తల్లికి చెప్పింది.

విషయం తెలుసుకున్న కుటుంబ సభ్యులు చుట్టుపక్కల వారికి సమాచారం ఇవ్వడంతో స్థానికులు పెద్ద సంఖ్యలో గుమిగూడారు. నిందితుడికి వ్యతిరేకంగా నినాదాలు చేస్తూ జాతీయ రహదారి-139పై ఉన్న సినిమా మోర్ వద్ద టైర్లు కాల్చి రాస్తారోకో చేపట్టారు. దీంతో వాహనాల రాకపోకలకు అంతరాయం ఏర్పడింది. పోలీసులు రంగప్రవేశం చేసి, ఇప్పటికే చర్యలు ప్రారంభించామని హామీ ఇవ్వడంతో వారు ఆందోళన విరమించారు.

ఫిర్యాదు అందిన వెంటనే నిందితుడిని అతడి నివాసంలో అరెస్ట్ చేశామని పోలీస్ ఇన్స్‌పెక్టర్ దేవవ్రత్ పొద్దార్ తెలిపారు. నిందితుడిపై పోక్సో చట్టంలోని సంబంధిత సెక్షన్ల కింద కేసు నమోదు చేసి జ్యుడీషియల్ కస్టడీకి తరలించినట్లు చెప్పారు. బాలికను వైద్య పరీక్షల కోసం మేదినినగర్‌కు పంపించామని, సాక్ష్యాధారాలు సేకరించి నిందితుడికి త్వరగా శిక్ష పడేలా చూస్తామని ఆయన హామీ ఇచ్చారు.

కొన్ని రోజుల క్రితం మహారాష్ట్రలోని పుణెలో ఇలాంటి ఘటనే జరగడం గమనార్హం. అక్కడ కూడా నాలుగేళ్ల బాలికపై ఓ వృద్ధుడు అత్యాచారం చేసి హత్య చేశాడు.