ఐఫోన్ యూజర్లకు అలర్ట్... కొత్త ఫీచర్లతో అప్‌డేట్ రిలీజ్!

ఐఫోన్ యూజర్ల కోసం యాపిల్ సంస్థ కొత్త సాఫ్ట్‌వేర్ అప్‌డేట్‌ను విడుదల చేసింది. ఐఓఎస్ 26.5 పేరుతో వచ్చిన ఈ అప్‌డేట్, మే 11 నుంచి ఐఫోన్ 11 ఆ తర్వాతి మోడళ్లకు అందుబాటులోకి వచ్చింది. ఇది భారీ మార్పులతో కూడిన అప్‌డేట్ కానప్పటికీ, మెసేజింగ్, భద్రత, యాప్ స్టోర్ వంటి అంశాల్లో పలు కీలక మెరుగుదలలను తీసుకొచ్చింది.

ఈ అప్‌డేట్‌లో అత్యంత ముఖ్యమైన ఫీచర్.. ఆండ్రాయిడ్ ఫోన్లతో చేసే ఆర్సీఎస్ మెసేజింగ్‌కు ఎండ్-టు-ఎండ్ ఎన్‌క్రిప్షన్ భద్రత కల్పించడం. దీనివల్ల ఐఫోన్ నుంచి ఆండ్రాయిడ్ ఫోన్లకు పంపే టెక్స్ట్ మెసేజ్‌లు, ఫొటోలు, వీడియోలు మరింత సురక్షితంగా మారతాయి. చాట్ విండోలో లాక్ ఐకాన్ కనిపిస్తే, ఆ సంభాషణ ఎన్‌క్రిప్ట్ అయినట్లు అర్థం. ప్రస్తుతం ఇది బీటా దశలో ఉంది.

ఇకపై యాపిల్ మ్యాప్స్‌లో కూడా యూజర్ సెర్చ్‌లు, సమీపంలోని ట్రెండ్స్ ఆధారంగా కొత్త ప్రదేశాలను సూచిస్తుంది. యాప్ స్టోర్‌లో వార్షిక సబ్‌స్క్రిప్షన్లను ఒకేసారి కాకుండా, 12 నెలల కట్టుబడితో నెలవారీ వాయిదాల్లో చెల్లించే వెసులుబాటును డెవలపర్లకు కల్పించారు. దీంతోపాటు మ్యాజిక్ కీబోర్డ్, మౌస్ వంటి యాక్సెసరీలను యూఎస్‌బీ-సీ ద్వారా ఒక్కసారి కనెక్ట్ చేస్తే చాలు, సులభంగా పెయిర్ అయ్యేలా మార్పులు చేశారు. కొత్త ప్రైడ్ లూమినెన్స్ వాల్‌పేపర్లు కూడా జోడించారు.

వీటితో పాటు 50కి పైగా భద్రతాపరమైన లోపాలను సరిదిద్దినట్లు, యూజర్ ఇంటర్‌ఫేస్‌లో చిన్న చిన్న మార్పులు చేసినట్లు యాపిల్ తెలిపింది. ఐఫోన్ యూజర్లు సెట్టింగ్స్ > జనరల్ > సాఫ్ట్‌వేర్ అప్‌డేట్ విభాగంలోకి వెళ్లి ఈ కొత్త వెర్షన్‌ను ఇన్‌స్టాల్ చేసుకోవచ్చు. అయితే, అందరూ ఎదురుచూస్తున్న జెమినీ ఇంటిగ్రేషన్‌తో కూడిన కొత్త తరం సిరి ఈ అప్‌డేట్‌లో లేదు.