ఈ నెలాఖరులో ఢిల్లీకి సీఎం విజయ్.. ప్రధానితో తొలి భేటీ

తమిళనాడు ముఖ్యమంత్రి, తమిళగ వెట్రి కళగం (టీవీకే) అధినేత సి.జోసెఫ్ విజయ్ త్వరలో ఢిల్లీలో పర్యటించనున్నారు. ముఖ్యమంత్రిగా బాధ్యతలు చేపట్టిన తర్వాత ఆయన ఢిల్లీకి వెళ్లడం ఇదే తొలిసారి. ఈ నెలాఖరులో జరగనున్న ఈ పర్యటనలో భాగంగా ఆయన దేశంలోని అగ్రనాయకత్వంతో వరుస సమావేశాల్లో పాల్గొననున్నారు.

విశ్వసనీయ వర్గాల సమాచారం ప్రకారం మే 18 తర్వాత తమిళనాడు కేబినెట్ విస్తరణ జరగవచ్చు. ఆ తర్వాత మే మూడో లేదా చివరి వారంలో విజయ్ రెండు రోజుల పాటు ఢిల్లీలో పర్యటించే అవకాశం ఉంది. కొత్తగా ఏర్పడిన ప్రభుత్వం పరిపాలనపై పట్టు సాధించిన తర్వాత ఈ పర్యటనకు ప్రణాళికలు సిద్ధం చేశారు. కొత్త ముఖ్యమంత్రులు ప్రమాణ స్వీకారం తర్వాత మర్యాదపూర్వకంగా ప్రధాని, రాష్ట్రపతిని కలవడం సంప్రదాయం. ఇందులో భాగంగా విజయ్.. ప్రధాని నరేంద్ర మోదీ, రాష్ట్రపతి ద్రౌపది ముర్ముతో సమావేశమవుతారు.

వీరితో పాటు ఉపరాష్ట్రపతి సి.పి.రాధాకృష్ణన్, కేంద్ర హోంమంత్రి అమిత్ షా, ఆర్థిక మంత్రి నిర్మలా సీతారామన్‌లతో కూడా సీఎం విజయ్ చర్చలు జరపనున్నారు. ఈ సందర్భంగా, తమ ప్రభుత్వ ప్రాధాన్యతలను, విధానాలను కేంద్ర నాయకత్వానికి వివరించనున్నారు. రాష్ట్రానికి సంబంధించిన ఆర్థిక అవసరాలు, పెండింగ్‌లో ఉన్న నిధుల విడుదల, నష్టపరిహార బకాయిలు, కేంద్ర ప్రాయోజిత పథకాలకు అదనపు సాయం వంటి డిమాండ్లతో కూడిన ఒక వినతిపత్రాన్ని కేంద్రానికి సమర్పించనున్నారు.

ఈ పర్యటనలో మౌలిక సదుపాయాల ప్రాజెక్టులు, పారిశ్రామిక పెట్టుబడులు, రవాణా సౌకర్యాలు వంటి కీలక అంశాలపై కూడా చర్చలు జరిగే అవకాశం ఉంది. ఇటీవలి అసెంబ్లీ ఎన్నికల్లో భారీ విజయంతో రాజకీయ శక్తిగా ఎదిగిన తర్వాత విజయ్ జాతీయ నాయకత్వంతో నేరుగా సమావేశం కానుండటంతో ఈ పర్యటనకు రాజకీయంగానూ ప్రాధాన్యత ఏర్పడింది. ఈ భేటీల ద్వారా కేంద్రంతో సత్సంబంధాలు నెలకొల్పుకొని, రాష్ట్రంలో తలపెట్టిన అభివృద్ధి కార్యక్రమాలకు సహకారం పొందాలని టీవీకే ప్రభుత్వం భావిస్తోంది.