పోస్టల్ శాఖ జీడీఎస్: మూడో మెరిట్ జాబితా విడుదల..

భారత తపాలా శాఖ (India Post) గ్రామీణ డాక్ సేవక్ (జీడీఎస్) పోస్టుల భర్తీ ప్రక్రియలో మరో కీలక ముందడుగు వేసింది. దేశవ్యాప్తంగా 28,636 జీడీఎస్ ఖాళీల భర్తీకి సంబంధించి మూడో మెరిట్ జాబితాను (సప్లిమెంటరీ లిస్ట్-III) సోమవారం విడుదల చేసింది. జనవరి 2026 షెడ్యూల్‌లో భాగంగా చేపట్టిన ఈ నియామక ప్రక్రియలో, మొదటి రెండు జాబితాల తర్వాత మిగిలిపోయిన ఖాళీలను ఈ జాబితాతో భర్తీ చేయనున్నారు.

ఈ మూడో జాబితాలో దేశవ్యాప్తంగా మొత్తం 6,690 మంది అభ్యర్థులు ఎంపికయ్యారు. ఆంధ్రప్రదేశ్ నుంచి 342 మంది, తెలంగాణ నుంచి 106 మంది చోటు దక్కించుకున్నారు. ఎంపికైన అభ్యర్థులు తమ అధికారిక ధ్రువపత్రాల పరిశీలన (డాక్యుమెంట్ వెరిఫికేషన్) ప్రక్రియను పూర్తి చేసుకోవాల్సి ఉంటుంది.

జాబితాలో ఎంపికైన అభ్యర్థులు మే 26, 2026 లోపు తమకు కేటాయించిన డివిజనల్ కార్యాలయానికి హాజరు కావాలి. "షార్ట్‌లిస్ట్ చేయబడిన అభ్యర్థులు తమ పత్రాలను ధృవీకరించుకోవాలి. అన్ని సంబంధిత పత్రాల అసలు ప్రతులు మరియు రెండు సెట్ల ఫోటోకాపీలతో హాజరు కావాలి" అని అధికారిక నోటిఫికేషన్‌లో స్పష్టం చేశారు. గడువులోగా వెరిఫికేషన్‌కు హాజరుకాని పక్షంలో వారి అభ్యర్థిత్వం రద్దవుతుంది.

పదో తరగతి మార్కుల ఆధారంగా, ఎలాంటి రాతపరీక్ష లేకుండా మెరిట్ ప్రాతిపదికన ఈ ఎంపికలు జరుగుతున్న విషయం తెలిసిందే. అభ్యర్థులు తమ ఫలితాలను అధికారిక వెబ్‌సైట్ `indiapostgdsonline.gov.in`లో చెక్ చేసుకోవచ్చు.