కొంపదీసి తుమ్మును ఆపుతున్నారా ఏంటి? చెవులు, మెదడుకు ముప్పు తెచ్చుకోవడమే!

పదిమందిలో ఉన్నప్పుడు ఇబ్బందిగా అనిపించి కొంతమంది తుమ్మును బలవంతంగా ఆపుకుంటారు. అయితే ఇలా తుమ్మును అణచివేయడం వల్ల తీవ్రమైన ఆరోగ్య సమస్యలు తలెత్తుతాయని వైద్యులు హెచ్చరిస్తున్నారు. తుమ్ము కేవలం శారీరక చర్య మాత్రమే కాదు. అది మన శ్వాసనాళాల్లో ఉండే దుమ్ము, ధూళి, సూక్ష్మక్రిములను బయటకు పంపే ఒక ప్రతిక్రియ.

ఆపితే ఏమవుతుంది?
మనం ముక్కును గట్టిగా పట్టుకుని లేదా నోరు మూసుకుని తుమ్మును ఆపినప్పుడు ఆ వేగంతో వచ్చే ఒత్తిడి తిరిగి శరీరంలోని సున్నితమైన భాగాల వైపు మళ్లుతుంది. దీంతో తల, శ్వాస వ్యవస్థలోని సున్నితమైన భాగాలపై తీవ్ర ప్రభావం పడుతుంది. ముక్కు, గొంతులో ఒత్తిడి ఒక్కసారిగా పెరుగుతుంది. ఫలితంగా ముక్కులోని శ్లేష్మం (ముక్కు నీరు), గాలి కలిపి యూస్టాచియన్ ట్యూబ్ ద్వారా మధ్య చెవిలోకి వెళ్లే అవకాశం ఉంది. దీనివల్ల చెవిలో నొప్పి రావడం, ఇన్ఫెక్షన్లు కలగడం, అరుదైన సందర్భాల్లో చెవి కర్ణభేరి చిరిగిపోయే ప్రమాదం కూడా ఉంటుంది. అలాగే శ్లేష్మం తిరిగి సైనస్ రంధ్రాల్లోకి వెళ్లడం వల్ల అక్కడ బ్యాక్టీరియా చేరి సైనస్ నొప్పి, ఇన్ఫెక్షన్లకు దారితీస్తుంది.

అరుదైన కానీ ప్రమాదకరమైన గాయాలు
తుమ్మును ఆపడం వల్ల గొంతులోని కణజాలం దెబ్బతినే అవకాశం ఉందని వైద్యులు చెబుతున్నారు. అలాగే కళ్లలోని లేదా మెదడులోని చిన్న చిన్న రక్తనాళాలపై కూడా ఒత్తిడి పడుతుంది. ముఖ్యంగా రక్తపోటు (బీపీ), ఆస్తమా, సైనస్ సమస్యలు ఉన్నవారు తుమ్మును అస్సలు ఆపొద్దు. ఇది వారి అనారోగ్యాన్ని మరింత పెంచుతుందని డాక్టర్లు హెచ్చరిస్తున్నారు.

సురక్షితంగా తుమ్మడం ఎలా?
తుమ్ము వచ్చినప్పుడు దాన్ని ఆపకుండా ఇతరులకు ఇబ్బంది కలగకుండా జాగ్రత్తలు తీసుకోవాలని డాక్టర్లు సూచిస్తున్నారు. ముక్కు, నోటికి అడ్డంగా టిష్యూ పేపర్ ఉంచుకోవాలి. లేదంటే మోచేయిని అడ్డం పెట్టుకోవాలి. తుమ్మిన తర్వాత టిష్యూను పారేసి, చేతులను శుభ్రం చేసుకోవాలి. తుమ్మును ఆపడం నాగరికత అని భావించొద్దు. మీ శరీరం బయటకు పంపాలనుకుంటున్న వ్యర్థాలను ఆపడం అంటే రోగాలను ఆహ్వానించడమేనని డాక్టర్లు స్పష్టం చేస్తున్నారు.