ఇకపై విద్యార్థులతో అలాంటి డ్యాన్సులు కుదరవు: కర్ణాటక ప్రభుత్వం కీలక ఆదేశాలు

పాఠశాలల్లో నిర్వహించే సాంస్కృతిక కార్యక్రమాలపై కర్ణాటక విద్యాశాఖ కీలక ఆదేశాలు జారీ చేసింది. విద్యార్థులతో అశ్లీల, అసభ్యకరమైన పాటలకు డ్యాన్సులు చేయించవద్దని మంగళవారం నాడు స్పష్టం చేసింది. ఈ మేరకు రాష్ట్రంలోని అన్ని ప్రభుత్వ, ఎయిడెడ్, ప్రైవేట్ పాఠశాలలకు ఏప్రిల్ 16వ తేదీతో సర్క్యులర్ పంపింది. విద్యాసంస్థల పవిత్రతను దెబ్బతీసే ఇలాంటి చర్యలు విద్యార్థులపై ప్రతికూల ప్రభావం చూపుతాయని పేర్కొంది.

విద్యార్థుల పాత్ర, విలువలు, ప్రవర్తనను తీర్చిదిద్దడంలో పాఠశాలలు కీలక పాత్ర పోషిస్తాయని విద్యాశాఖ తన సర్క్యులర్‌లో తెలిపింది. స్కూల్ ఈవెంట్లలో అశ్లీల పాటలపై డ్యాన్సులు చేయడం వల్ల విద్యార్థుల మానసిక ఆరోగ్యం దెబ్బతినడమే కాకుండా, వారిలో నైతిక విలువలు పడిపోతాయని ఆందోళన వ్యక్తం చేసింది. ఇలాంటి కార్యక్రమాలు క్రమశిక్షణారాహిత్యానికి దారితీస్తాయని అభిప్రాయపడింది.

ఈ నేపథ్యంలో పాఠశాల ఈవెంట్లలో స్ఫూర్తిదాయకమైన, దేశభక్తిని పెంపొందించే గీతాలనే ఎంపిక చేసుకోవాలని సూచించింది. కన్నడ సంస్కృతి, విలువలు, గౌరవాన్ని ప్రతిబింబించే పాటలకు ప్రాధాన్యత ఇవ్వాలని కోరింది. అలాగే, సాంస్కృతిక కార్యక్రమాల్లో విద్యార్థులు హుందాగా ఉండే దుస్తులు ధరించేలా ప్రోత్సహించాలని యాజమాన్యాలకు సలహా ఇచ్చింది.

పాటలు, డ్యాన్సుల ఎంపిక బాధ్యత పూర్తిగా స్కూల్ హెడ్‌మాస్టర్లు, యాజమాన్యాలదేనని స్పష్టం చేసింది. నిబంధనలు ఉల్లంఘించినట్లు తేలితే సంబంధిత పాఠశాల యాజమాన్యంపై కఠిన చర్యలు తీసుకుంటామని హెచ్చరించింది. కర్ణాటక రక్షణ వేదిక స్వాభిమాని బణ బెంగళూరు యూనిట్ అధ్యక్షుడు ఇచ్చిన వినతిపత్రం మేరకు ఈ ఆదేశాలు జారీ చేసినట్లు అధికారులు తెలిపారు.