ఏమన్నా బ్యాటింగా ఇది... ఐపీఎల్ లో రికార్డు ఛేజింగ్... 265 పరుగుల టార్గెట్ ఉఫ్!

ఐపీఎల్ చరిత్రలో ఓ అద్భుతం ఆవిష్కృతమైంది. టీ20 క్రికెట్‌లో అత్యంత కష్టసాధ్యం అనుకున్న లక్ష్యాన్ని పంజాబ్ కింగ్స్ అసాధారణ బ్యాటింగ్ తో ఛేదించింది. ఢిల్లీ క్యాపిటల్స్‌తో జరిగిన మ్యాచ్‌లో 265 పరుగుల భారీ లక్ష్యాన్ని మరో 7 బంతులు మిగిలి ఉండగానే ఛేదించి సరికొత్త చరిత్ర సృష్టించింది. ఐపీఎల్ చరిత్రలోనే ఇది అత్యధిక పరుగుల విజయవంతమైన ఛేదనగా రికార్డులకెక్కింది. ప్రభ్‌సిమ్రాన్ సింగ్, కెప్టెన్ శ్రేయస్ అయ్యర్ అద్భుత అర్ధ శతకాలతో పంజాబ్ చారిత్రక విజయం సాధించింది.

అరుణ్ జైట్లీ స్టేడియం వేదికగా జరిగిన ఈ మ్యాచ్‌లో పరుగుల వరద పారింది. తొలుత బ్యాటింగ్ చేసిన ఢిల్లీ నిర్దేశించిన 265 పరుగుల భారీ లక్ష్య ఛేదనకు దిగిన పంజాబ్ ఆరంభం నుంచే ఎదురుదాడికి దిగింది. ఓపెనర్లు ప్రభ్‌సిమ్రాన్ సింగ్ (26 బంతుల్లో 76; 9 ఫోర్లు, 5 సిక్సర్లు), ప్రియాన్ష్ ఆర్య (17 బంతుల్లో 43; 2 ఫోర్లు, 5 సిక్సర్లు) ఆకాశమే హద్దుగా చెలరేగారు. వీరిద్దరూ తొలి వికెట్‌కు కేవలం 6.5 ఓవర్లలోనే 126 పరుగులు జోడించి విజయానికి బలమైన పునాది వేశారు. ముఖ్యంగా పవర్‌ప్లేలో పంజాబ్ 116 పరుగులు రాబట్టి ఢిల్లీ బౌలర్లను పూర్తిగా ఒత్తిడిలోకి నెట్టింది.

ఓపెనర్లు వెనుదిరిగిన తర్వాత కూడా పంజాబ్ జోరు తగ్గలేదు. కెప్టెన్ శ్రేయస్ అయ్యర్ (36 బంతుల్లో 71*; 3 ఫోర్లు, 7 సిక్సర్లు) బాధ్యతాయుతమైన, విధ్వంసకర ఇన్నింగ్స్‌తో జట్టును ముందుండి నడిపించాడు. కూపర్ కానలీ (17), నేహాల్ వధేరా (25) కూడా తమ వంతు సహకారం అందించారు. ముఖ్యంగా శ్రేయస్ అయ్యర్ చివరి వరకు క్రీజులో నిలబడి జట్టును విజయతీరాలకు చేర్చాడు. చివర్లో శశాంక్ సింగ్ (10 బంతుల్లో 19*)తో కలిసి మరో వికెట్ పడకుండా లాంఛనాన్ని పూర్తి చేశాడు. దీంతో పంజాబ్ 18.5 ఓవర్లలో 4 వికెట్లు కోల్పోయి 265 పరుగులు చేసి అద్భుత విజయాన్ని అందుకుంది.

అంతకుముందు, టాస్ గెలిచి బ్యాటింగ్ ఎంచుకున్న ఢిల్లీ క్యాపిటల్స్ కూడా పరుగుల సునామీ సృష్టించింది. కెప్టెన్ కేఎల్ రాహుల్ (67 బంతుల్లో 152*; 16 ఫోర్లు, 9 సిక్సర్లు) ఆకాశమే హద్దుగా చెలరేగి అజేయ శతకంతో కదం తొక్కాడు. అతనికి నితీశ్ రాణా (44 బంతుల్లో 91; 11 ఫోర్లు, 4 సిక్సర్లు) అద్భుతమైన సహకారం అందించాడు. వీరిద్దరూ రెండో వికెట్‌కు ఏకంగా 220 పరుగుల భారీ భాగస్వామ్యం నెలకొల్పారు. దీంతో ఢిల్లీ నిర్ణీత 20 ఓవర్లలో 2 వికెట్ల నష్టానికి 264 పరుగుల భారీ స్కోరు సాధించింది. అయితే, పంజాబ్ బ్యాటర్ల ధాటికి రాహుల్ వీర శతకం వృథాగా మిగిలింది.