పుచ్చకాయల్లో రంగుల మోసం.. మీరు తినేది అసలైనదేనా?

వేసవి తాపాన్ని తగ్గించుకోవడానికి చల్లచల్లని పుచ్చకాయ ముక్క తింటే ఆ అనుభూతే వేరు. అధిక నీటిశాతం ఉండటం వల్ల ఇది శరీరాన్ని చల్లబరచడమే కాకుండా డీహైడ్రేషన్ బారిన పడకుండా కాపాడుతుంది. అయితే, ఈ రోజుల్లో మార్కెట్లో దొరికే పుచ్చకాయలన్నీ స్వచ్ఛమైనవి కావని, రసాయనాలతో కల్తీ అవుతున్నాయని నివేదికలు హెచ్చరిస్తున్నాయి. పండు నిగనిగలాడుతూ, లోపల ఎర్రగా కనిపించేలా చేయడానికి కొందరు వ్యాపారులు ప్రమాదకర రసాయనాలను ఇంజెక్ట్ చేస్తున్నారు. ఈ రంగును చూసి ఆకర్షితులై చాలామంది కల్తీ పండ్లను కొనుగోలు చేసి మోసపోతున్నారు.

కల్తీని ఎలా గుర్తిస్తున్నారు?
పుచ్చకాయలు మరింత ఆకర్షణీయంగా, ఎర్రగా కనిపించడానికి 'ఎరిత్రోసిన్' లేదా 'రెడ్-బి' అనే రసాయన రంగును ఇంజెక్ట్ చేస్తున్నట్టు తేలింది. ఇలాంటి కాయలు పైకి చూడటానికి తాజాగా ఉన్నా, లోపల రుచిహీనంగా లేదా పాడైపోయినట్టుగా ఉంటాయి. ఈ నేపథ్యంలో ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా (ఎఫ్ఎస్ఎస్ఏఐ) ఒక వీడియోను విడుదల చేసింది. దీని ద్వారా ఇంట్లోనే పుచ్చకాయ కల్తీని సులభంగా గుర్తించవచ్చు.

వీడియోలో చూపిన ప్రకారం ముందుగా పుచ్చకాయను రెండు భాగాలుగా కోయాలి. తర్వాత ఒక తెల్లటి దూదిని (cotton) తీసుకుని, పండులోని ఎర్రటి గుజ్జుపై మెల్లగా రుద్దాలి. దూదికి ఎలాంటి రంగు అంటకపోతే, ఆ పుచ్చకాయ సహజంగా పండిందని, తినడానికి సురక్షితమని అర్థం. ఒకవేళ దూది ఎర్రగా మారితే, దానికి కృత్రిమ రంగు కలిపారని, అది కల్తీ పండు అని నిర్ధారించుకోవాలి.

ఆరోగ్యానికి ప్రమాదం
ఇలాంటి కల్తీ పుచ్చకాయలు తినడం వల్ల కడుపునొప్పి, వాంతులు, విరేచనాలు, గొంతులో మంట వంటి తక్షణ ఆరోగ్య సమస్యలు తలెత్తుతాయి. వీటిని దీర్ఘకాలం పాటు తీసుకుంటే కాలేయం దెబ్బతినడం వంటి తీవ్రమైన అనారోగ్యాల బారిన పడే ప్రమాదం కూడా ఉంది.

మంచి పుచ్చకాయను ఎలా ఎంచుకోవాలి?
మార్కెట్లో పుచ్చకాయ కొనేటప్పుడే కొన్ని జాగ్రత్తలు తీసుకుంటే కల్తీ బారిన పడకుండా ఉండవచ్చు.
బరువు: పుచ్చకాయ దాని పరిమాణానికి తగినట్టుగా బరువుగా ఉండాలి.
శబ్దం: చేతితో తట్టినప్పుడు డొల్లగా, గంభీరమైన శబ్దం రావాలి.
కింద ఉండే మచ్చ: నేలపై ఆనుకుని ఉండే భాగం పసుపు లేదా లేత నారింజ రంగులో ఉండాలి. ఆ మచ్చ తెల్లగా లేదా పచ్చగా ఉంటే, కాయను త్వరగా కోసేశారని అర్థం.
ఆకారం: కాయ సమానమైన ఆకారంలో, ఎత్తుపల్లాలు లేకుండా నున్నగా ఉండాలి.

ఈ చిన్నపాటి జాగ్రత్తలు తీసుకుంటే, ఈ వేసవిలో పుచ్చకాయను ఎలాంటి భయం లేకుండా ఆస్వాదించవచ్చు.