మహారాష్ట్రలో ఘోరం.. 350 అశ్లీల వీడియోలు.. 180 మంది బాధితులు

మహారాష్ట్రలోని అమరావతిలో అత్యంత దారుణమైన ఘటన వెలుగులోకి వచ్చింది. సుమారు 180 మందికి పైగా మైనర్ బాలికలను లైంగికంగా దాడి చేసి, 350కి పైగా అశ్లీల వీడియోలు చిత్రీకరించిన కేసులో పోలీసులు ఒక వ్యక్తిని అరెస్ట్ చేశారు. బీజేపీ రాజ్యసభ ఎంపీ చేసిన ఫిర్యాదుతో పోలీసులు వేగంగా స్పందించి నిందితుడిని అదుపులోకి తీసుకున్నారు.

వివరాల్లోకి వెళితే... పరాత్‌వాడ నగరానికి చెందిన మహమ్మద్ అయాజ్ అలియాస్ తన్వీర్ అనే వ్యక్తి మైనర్ బాలికలను లక్ష్యంగా చేసుకున్నాడు. వాట్సాప్, స్నాప్‌చాట్ గ్రూపుల ద్వారా బాలికలకు ప్రేమ పేరుతో వల వేసేవాడు. వారిని నమ్మించి ముంబై, పుణె వంటి నగరాలకు తీసుకెళ్లి అశ్లీల వీడియోలు చిత్రీకరించినట్లు ఆరోపణలు ఉన్నాయి. ఆ వీడియోలను అడ్డుపెట్టుకుని బాలికలను బ్లాక్‌మెయిల్ చేస్తూ, బలవంతంగా వ్యభిచారంలోకి దింపినట్లు తెలుస్తోంది. కొన్ని వీడియోలను ఆన్‌లైన్‌లో కూడా షేర్ చేసినట్లు సమాచారం.

ఈ దారుణంపై బీజేపీ ఎంపీ అనిల్ బోండే, ఎస్పీ విశాల్ ఆనంద్‌కు ఒక మెమోరాండం సమర్పించారు. కేసు విచారణకు ప్రత్యేక దర్యాప్తు బృందం (సిట్) ఏర్పాటు చేయాలని, లేనిపక్షంలో బుధవారం ఉదయం ఎస్పీ కార్యాలయం ఎదుట నిరసన తెలుపుతామని ఆయన హెచ్చరించారు. ఈ ఘటనపై ముస్లిం సమాజానికి చెందిన కొందరు కూడా పోలీస్ స్టేషన్‌కు వెళ్లి నిందితుడిపై కఠిన చర్యలు తీసుకోవాలని, ఇలాంటి వారి వల్ల సమాజానికి చెడ్డపేరు వస్తుందని ఆవేదన వ్యక్తం చేశారు.

నిందితుడు మహమ్మద్ అయాజ్ గతంలో ఏఐఎంఐఎం పార్టీలో ఓ హోదాలో పనిచేసినట్లు ఆరోపణలు వస్తున్నాయి. ఎంఐఎం అమరావతి అధ్యక్షుడు హాజీ ఇర్ఫాన్ ఖాన్ నుంచి లేఖ అందుకుంటున్నట్లు, పార్టీ ర్యాలీల్లో రీల్స్ చేస్తున్నట్లు ఉన్న కొన్ని వీడియోలు, ఫొటోలు అతని సోషల్ మీడియాలో కనిపించాయి. అయితే, ఈ కేసు బయటకు వచ్చిన తర్వాత అతని ఇన్‌స్టాగ్రామ్ ఖాతా నుంచి చాలా వీడియోలు డిలీట్ అయ్యాయి.

ఫిర్యాదు అందిన వెంటనే రంగంలోకి దిగిన పోలీసులు అయాజ్‌ను అరెస్ట్ చేసి కోర్టులో హాజరుపరిచారు. న్యాయస్థానం అతనికి ఏడు రోజుల పోలీస్ కస్టడీ విధించింది. అతని మొబైల్ ఫోన్‌ను స్వాధీనం చేసుకున్న పోలీసులు, అందులో అనేక అభ్యంతరకర వీడియోలు ఉన్నట్లు గుర్తించారు. ఈ వీడియోలను స్నేహితులకు గానీ, మరేదైనా ముఠాకు గానీ షేర్ చేశాడా? అనే కోణంలో పోలీసులు దర్యాప్తు చేస్తున్నారు. సైబర్ సెల్ సహాయంతో ఆన్‌లైన్‌లో వ్యాప్తి చెందిన వీడియోలపైనా విచారణ కొనసాగుతోంది.