సన్‌రైజర్స్‌కు గుడ్ న్యూస్.. తిరిగి రానున్న కెప్టెన్ పాట్ కమిన్స్

ఐపీఎల్ 2026 సీజన్‌లో నిలకడగా రాణిస్తున్న సన్‌రైజర్స్ హైదరాబాద్ (ఎస్ఆర్ హెచ్) జట్టుకు భారీ శుభవార్త అందింది. గాయం కారణంగా జట్టుకు దూరమైన రెగ్యులర్ కెప్టెన్ పాట్ కమిన్స్ తిరిగి జట్టులో చేరనున్నాడు. ఏప్రిల్ 18న హైదరాబాద్‌లోని రాజీవ్ గాంధీ స్టేడియంలో చెన్నై సూపర్ కింగ్స్‌తో జరగనున్న కీలక మ్యాచ్‌కు ఒక రోజు ముందు, అంటే ఏప్రిల్ 17న కమిన్స్ హైదరాబాద్ రానున్నాడు.

క్రిక్‌బజ్ కథనం ప్రకారం, కమిన్స్ బుధవారం స్వదేశంలో ఫిట్‌నెస్ పరీక్షకు హాజరవుతాడు. అందులో పాసైతే, అతడు తిరిగి జట్టుతో చేరి ఆడే అవకాశం ఉంది. ఈ విషయంపై ఫ్రాంచైజీ వర్గాలు ఆశాభావంతో ఉన్నాయి. "అతడు టెస్టులో పాసై, క్రికెట్ ఆస్ట్రేలియా నుంచి ఎన్ఓసీ పొందుతాడని ఆశిస్తున్నాం" అని సంబంధిత వర్గాలు వెల్లడించాయి.

సీజన్ ప్రారంభానికి ముందు భారత్‌కు వచ్చినప్పటికీ, కమిన్స్ ఒక్క మ్యాచ్ కూడా ఆడలేదు. ఏప్రిల్ 2న కోల్‌కతా నైట్ రైడర్స్‌తో జరిగిన మ్యాచ్ తర్వాత వెన్నునొప్పి స్కానింగ్ కోసం అతడు ఆస్ట్రేలియాకు తిరిగి వెళ్లాడు. యాషెస్ సిరీస్ తర్వాత కమిన్స్ ఒక్క మ్యాచ్ కూడా ఆడకపోవడం, ఇటీవల ముగిసిన టీ20 ప్రపంచకప్‌నకు కూడా దూరం కావడం గమనార్హం.

కమిన్స్ గైర్హాజరీలో ఇషాన్ కిషన్ జట్టుకు కెప్టెన్‌గా వ్యవహరిస్తున్నాడు. అతని సారథ్యంలో హైదరాబాద్ ఇప్పటివరకు ఆడిన ఐదు మ్యాచ్‌లలో రెండింటిలో గెలిచి, పాయింట్ల పట్టికలో నాలుగో స్థానంలో కొనసాగుతోంది. సోమవారం జరిగిన మ్యాచ్‌లో టేబుల్ టాపర్ రాజస్థాన్ రాయల్స్‌పై 57 పరుగుల తేడాతో అద్భుత విజయం సాధించి మంచి ఊపు మీదుంది. ఇప్పుడు కమిన్స్ రాక జట్టుకు మరింత బలాన్ని చేకూర్చనుంది.