కుమార్తె ఆత్మహత్యతో కుంగిపోయిన ఆశా భోంస్లే

ప్రముఖ గాయని ఆశా భోంస్లే తన గానంతో కోట్లాది మంది హృదయాలను గెలుచుకున్నారు. అయితే, ఆమె జీవితంలో ఒక తీరని విషాదం ఆమెను జీవితాంతం వెంటాడింది. అదే ఆమె కుమార్తె వర్షా భోంస్లే ఆత్మహత్య. ఈ ఘటన ఆశా భోంస్లేను మానసికంగా తీవ్రంగా కుంగదీసింది.

వర్షా భోంస్లే (56) 2012 అక్టోబర్ 8న ముంబైలోని తన నివాసంలో ఆత్మహత్య చేసుకున్నారు. గాయనిగా, కాలమిస్ట్‌గా పనిచేసిన వర్ష, కొంతకాలంగా తీవ్రమైన డిప్రెషన్‌తో బాధపడ్డారు. 1998లో భర్త నుంచి విడాకులు తీసుకున్న తర్వాత ఆమె తన తల్లి ఆశాతోనే కలిసి ఉన్నారు. అంతకుముందు 2008లో కూడా నిద్రమాత్రలు మింగి ఆత్మహత్యకు యత్నించారు.

2012లో ఆత్మహత్య సంఘటన జరిగిన రోజు, వర్ష తన గదిలోని సోఫాలో రక్తపు మడుగులో పడి ఉండటాన్ని డ్రైవర్, పనిమనిషి గమనించి పోలీసులకు సమాచారం ఇచ్చారు. ఆమె లైసెన్స్‌డ్ పిస్టల్‌తో తలపై కాల్చుకుని ఆత్మహత్య చేసుకున్నారని పోలీసులు నిర్ధారించారు. ఆ సమయంలో ఆశా భోంస్లే ఒక కార్యక్రమంలో పాల్గొనేందుకు సింగపూర్‌లో ఉన్నారు. కుమార్తె మరణవార్త విని ఆమె తీవ్ర దిగ్భ్రాంతికి గురయ్యారు.

కుమార్తె మరణం తన జీవితంలో అతిపెద్ద దెబ్బ అని, ఆ వేదనను తన చివరి శ్వాస వరకు మరచిపోలేనని ఆశా భోంస్లే పలు సందర్భాల్లో ఆవేదన వ్యక్తం చేశారు. వేదికపై ఎంతో ఉత్సాహంగా కనిపించే ఆశా భోంస్లే, తన వ్యక్తిగత జీవితంలో కుమార్తెను కోల్పోయిన దుఃఖాన్ని మోస్తూనే గడిపారు. ఈ విషాదం ఆమె జీవితంలో ఎప్పటికీ మాయని గాయంగా మిగిలిపోయింది.