ఇది మా యుద్ధం కాదు... మీరు ఎంత ఒత్తిడి చేసినా ఫలితం లేదు!: ట్రంప్ కు తేల్చిచెప్పిన బ్రిటన్ ప్రధాని

మధ్యప్రాచ్యంలో ఇరాన్‌తో ముడిపడిన ఉద్రిక్తతలు తీవ్రమవుతున్న వేళ, బ్రిటన్ ప్రధాని కీర్ స్టార్మర్ తమ దేశ వైఖరిని కుండబద్దలు కొట్టారు. "ఇది మా యుద్ధం కాదు. ఈ వివాదంలోకి మమ్మల్ని లాగొద్దు" అని ఆయన విస్పష్టంగా ప్రకటించారు. దేశ ప్రయోజనాలకే తమ ప్రభుత్వం పెద్ద పీట వేస్తుందని, బాహ్య ఒత్తిళ్లకు తలొగ్గేది లేదని అమెరికా అధ్యక్షుడు డొనాల్డ్  ట్రంప్ కు తేల్చిచెప్పారు.

ఇరాన్ తో యుద్ధంలో తమతో కలిసి రావడంలేదంటూ ట్రంప్ ఇటీవల మిత్రదేశాలను "పిరికిపందలు" అంటూ తీవ్రంగా నిందించడం తెలిసిందే. ఈ నేపథ్యంలో, బ్రిటన్ ప్రధాని కీర్ స్టార్మర్ వ్యాఖ్యలు ప్రాధాన్యత సంతరించుకున్నాయి. తమపై ఎంత ఒత్తిడి తెచ్చినా ఫలితం ఉండదని స్టార్మర్ బ్రిటన్ వైఖరిని సుస్పష్టం చేశారు. 

ఇటీవల ఇజ్రాయెల్-అమెరికా దాడుల అనంతరం, ఇరాన్ కీలకమైన హర్మూజ్ జలసంధిని దిగ్బంధించింది. ప్రపంచ ఇంధన రవాణాలో అత్యంత కీలకమైన ఈ మార్గం మూతపడటంతో అంతర్జాతీయంగా ముడిచమురు ధరలు ఆకాశాన్నంటాయి. ఈ ప్రభావం బ్రిటన్‌లోని సామాన్యుల జీవన వ్యయంపై కూడా పడుతోందని స్టార్మర్ అంగీకరించారు. ఈ నేపథ్యంలో ఆయన మాట్లాడుతూ, "నాపై ఎంత ఒత్తిడి వచ్చినా, ఎలాంటి గొడవ జరిగినా నేను కేవలం బ్రిటిష్ జాతీయ ప్రయోజనాలను దృష్టిలో పెట్టుకొనే నిర్ణయాలు తీసుకుంటాను. అందుకే ఇది మా యుద్ధం కాదని స్పష్టం చేస్తున్నా" అని పునరుద్ఘాటించారు.

అయితే, బ్రిటన్ పూర్తిగా ప్రేక్షకపాత్ర పోషించబోదని కూడా ఆయన సంకేతాలిచ్చారు. హర్మూజ్ జలసంధిని తిరిగి తెరిపించేందుకు దౌత్యపరమైన చర్యలు చేపడతామని తెలిపారు. ఇందులో భాగంగా విదేశాంగ మంత్రి యెవెట్ కూపర్ నేతృత్వంలో ఒక అంతర్జాతీయ సదస్సును నిర్వహిస్తామని ప్రకటించారు. ఈ సదస్సులో వివిధ దేశాల నాయకులతో చర్చించి, జలసంధిలో నౌకల స్వేచ్ఛా రవాణాను పునరుద్ధరించడానికి ఒక ప్రణాళికను రూపొందిస్తామని వివరించారు. "ఈ సమస్యను పరిష్కరించడం అంత సులభం కాదు. ప్రజలతో నేను నిజాయతీగా ఉండాలనుకుంటున్నాను" అని ఆయన పేర్కొన్నారు.

ప్రస్తుత సంక్షోభం ప్రజలపై చూపిస్తున్న ప్రభావాన్ని తగ్గించేందుకు తమ ప్రభుత్వం ఇప్పటికే కొన్ని చర్యలు తీసుకుందని స్టార్మర్ తెలిపారు. ఇంధన బిల్లులపై పరిమితి విధించడం, సెప్టెంబర్ వరకు ఇంధన పన్ను తగ్గింపును పొడిగించడం వంటి చర్యల ద్వారా కుటుంబాలపై భారాన్ని తగ్గించే ప్రయత్నం చేస్తున్నట్లు చెప్పారు. మరోవైపు, ఈ క్లిష్ట సమయంలో అమెరికా అధ్యక్షుడు డొనాల్డ్ ట్రంప్ నాటో కూటమి నుంచి వైదొలగే అంశాన్ని పరిశీలిస్తున్నారని, నాటోను "కాగితపు పులి" అని విమర్శించారని కూడా వార్తలు వస్తున్నాయి. ఈ సంక్లిష్ట అంతర్జాతీయ పరిణామాల మధ్య, బ్రిటన్ తన జాతీయ ప్రయోజనాలను కాపాడుకుంటూ దౌత్యమార్గంలో ముందుకు వెళ్లాలని నిర్ణయించుకుంది.