AN-26 crash: కొండను ఢీకొట్టిన రష్యా విమానం.. సిబ్బంది సహా 29 మంది మృతి

రష్యా సైన్యానికి చెందిన ఏఎన్-26 రవాణా విమానం క్రిమియా ద్వీపకల్పంలో కుప్పకూలింది. ఈ ఘోర ప్రమాదంలో విమానంలోని ఆరుగురు సిబ్బంది, 23 మంది ప్రయాణికులు సహా మొత్తం 29 మంది మరణించినట్లు రష్యా రక్షణ శాఖ బుధవారం తెల్లవారుజామున ధ్రువీకరించింది. విమానం నేరుగా ఒక కొండను ఢీకొట్టినట్లు ఘటనా స్థలంలోని ఒక అధికారి టాస్ వార్తా సంస్థకు తెలిపారు.

రక్షణ శాఖ కథనం ప్రకారం మార్చి 31వ తేదీ మంగళవారం మాస్కో కాలమానం ప్రకారం సాయంత్రం 6 గంటల సమయంలో షెడ్యూల్ ప్రకారం ప్రయాణిస్తున్న ఏఎన్-26 విమానంతో సంబంధాలు పూర్తిగా తెగిపోయాయి. వెంటనే అప్రమత్తమైన అధికారులు గాలింపు చర్యలు చేపట్టారు. గాలింపు బృందం విమాన శకలాలను గుర్తించి, అందులో ఉన్నవారెవరూ బతికిలేరని నిర్ధారించింది.

ప్రాథమిక సమాచారం ప్రకారం సాంకేతిక లోపం కారణంగానే ఈ ప్రమాదం జరిగిందని, దీనిపై శత్రువుల దాడి కోణం ఏమీ లేదని రక్షణ శాఖ స్పష్టం చేసింది. ఏఎన్-26 తేలికపాటి సైనిక రవాణా విమానం. దీని ద్వారా తక్కువ, మధ్యస్థ దూరాలకు సరుకుతో పాటు 40 మంది వరకు ప్రయాణికులను తరలించవచ్చు.

గత ఏడాది డిసెంబర్ 2025లో కూడా రష్యాలో ఇలాంటి ఘటనే చోటుచేసుకుంది. మరమ్మతుల అనంతరం చేపట్టిన టెస్ట్ ఫ్లైట్ సమయంలో ఏఎన్-22 విమానం కుప్పకూలి ఏడుగురు సిబ్బంది మరణించిన విషయం తెలిసిందే. తాజా ఘటనతో రష్యా సైనిక వర్గాల్లో విషాదం నెలకొంది.