పవన్ ఫ్యాన్స్‌కు కొత్త అనుభూతి... డాల్బీ సినిమా ఫార్మాట్‌లో 'ఉస్తాద్ భగత్ సింగ్'

పవర్ స్టార్ పవన్ కల్యాణ్ అభిమానులు ఎంతో ఆసక్తిగా ఎదురుచూస్తున్న 'ఉస్తాద్ భగత్ సింగ్' చిత్రం సరికొత్త అనుభూతిని పంచేందుకు సిద్ధమైంది. ఈ సినిమాను అత్యుత్తమ సాంకేతికత అయిన డాల్బీ సినిమా (Dolby Cinema) ఫార్మాట్‌లో విడుదల చేస్తున్నట్లు చిత్ర బృందం అధికారికంగా ప్రకటించింది. ఉగాది పండుగను పురస్కరించుకుని ఈ నెల 19న ప్రపంచవ్యాప్తంగా ఈ చిత్రాన్ని అత్యంత భారీ స్థాయిలో గ్రాండ్‌గా రిలీజ్ చేయనున్నారు.

గబ్బర్ సింగ్ లాంటి బ్లాక్ బస్టర్ తర్వాత పవన్ కల్యాణ్, డైరెక్టర్ హరీష్ శంకర్ కాంబినేషన్‌లో వస్తున్న ఈ సినిమాపై భారీ అంచనాలు ఉన్నాయి. ఇందులో పవన్ కల్యాణ్ సరసన శ్రీలీల, రాశీఖన్నా హీరోయిన్లుగా నటించారు. మైత్రీ మూవీ మేకర్స్ సంస్థ ఈ చిత్రాన్ని ప్రతిష్ఠాత్మకంగా నిర్మించింది. పవన్ కల్యాణ్‌ను ఇంతకుముందెన్నడూ చూడని అత్యుత్తమ ఫార్మాట్‌లో, డాల్బీ స్క్రీన్స్‌పై చూడటం అభిమానులకు గొప్ప థియేట్రికల్ ఎక్స్‌పీరియన్స్ ఇస్తుందని మేకర్స్ తెలిపారు.

సాధారణ థియేటర్ల కంటే డాల్బీ సినిమా ఫార్మాట్‌లో దృశ్య, శబ్ద నాణ్యత అత్యంత సహజంగా, అద్భుతంగా ఉంటుంది. ఈ సాంకేతికతతో ఉస్తాద్ భగత్ సింగ్ రానుండటంతో సినిమాపై ఆసక్తి మరింత పెరిగింది. ఈ చిత్రంలో నటుడు ఆర్.పార్థిబన్ కీలక పాత్ర పోషించగా, సినిమాటోగ్రాఫర్‌గా బోస్, ఆర్ట్ డైరెక్టర్‌గా ఆనంద్ సాయి పనిచేశారు. పండుగ కానుకగా కేవలం వారం రోజుల వ్యవధిలోనే సినిమా ప్రేక్షకుల ముందుకు రానుండటంతో అభిమానులు సంబరాలకు సిద్ధమవుతున్నారు.