టీమిండియా టీ20 ప్రపంచకప్ గెలుపు రహస్యాన్ని బయటపెట్టిన కెప్టెన్ సూర్యకుమార్

టీమిండియా చరిత్ర సృష్టించింది. అహ్మదాబాద్‌లోని నరేంద్ర మోదీ స్టేడియంలో జరిగిన టీ20 ప్రపంచకప్ ఫైనల్లో న్యూజిలాండ్‌పై 96 పరుగుల తేడాతో ఘన విజయం సాధించి, మూడోసారి విశ్వవిజేతగా నిలిచింది. భారత జట్టు ఈ విజయంతో మూడు టీ20 ప్రపంచకప్‌లు గెలిచిన తొలి జట్టుగా చారిత్రక రికార్డును నెలకొల్పింది.

ఈ టోర్నమెంట్‌లో టీమిండియా అద్భుత ప్రదర్శన కనబరిచింది. సూపర్ 8 దశలో దక్షిణాఫ్రికాతో జరిగిన ఒక్క మ్యాచ్‌లో మాత్రమే ఓటమి పాలైంది. ఈ ఓటమితో సెమీస్ అవకాశాలు సంక్లిష్టంగా మారాయి. దీంతో వెస్టిండీస్‌తో జరిగిన మ్యాచ్ వర్చువల్ క్వార్టర్‌ఫైనల్‌గా మారింది. ఈ కీలక మ్యాచ్‌లో సమష్టిగా రాణించిన భారత్, ఘన విజయం సాధించి సెమీఫైనల్‌కు దూసుకెళ్లింది.

ప్రపంచకప్ గెలిచిన తర్వాత కెప్టెన్ సూర్యకుమార్ యాదవ్, జట్టు పుంజుకున్న తీరు వెనుక ఉన్న ఆసక్తికర విషయాలను పంచుకున్నాడు. ది ఇండియన్ ఎక్స్‌ప్రెస్‌తో మాట్లాడుతూ, దక్షిణాఫ్రికా చేతిలో ఓటమి తర్వాత జట్టును తిరిగి గాడిలో పెట్టేందుకు తెర వెనుక జరిగిన ప్రయత్నాలను వివరించాడు. "ఫీల్డింగ్ కోచ్ టి. దిలీప్ ప్రాక్టీస్ సెషన్లలో అత్యుత్తమ ఫీల్డర్‌కు రూ.10,000 నగదు బహుమతిని ప్రవేశపెట్టారు. ఇది ఆటగాళ్లలో కొత్త ఉత్సాహాన్ని నింపింది. అలాగే, సౌతాఫ్రికాతో ఓటమి తర్వాత మా వీడియో అనలిస్ట్ గత రెండేళ్ల ప్రదర్శనతో కూడిన పది నిమిషాల వీడియోను చూపించారు. బ్యాటర్ల కోసం బాహుబలి పాటతో, బౌలర్ల కోసం 'ఓ షేరా తీర్ తే తాజ్' పాటతో ఆ వీడియోలను రూపొందించారు. ఇలాంటి చిన్న చిన్న క్షణాలే జట్టును మరింత బలోపేతం చేస్తాయి" అని సూర్య తెలిపాడు.

జట్టు వాతావరణం గురించి మాట్లాడుతూ, డ్రెస్సింగ్ రూమ్‌లో ప్రతి ఒక్కరూ స్వేచ్ఛగా మాట్లాడే అవకాశం ఉంటుందని సూర్య స్పష్టం చేశాడు. "జట్టులో ప్రతీ ఒక్కరి అభిప్రాయానికి విలువ ఉంటుంది. నేను అందరితో నేరుగా మాట్లాడటానికి ప్రయత్నిస్తాను. కొన్నిసార్లు ఒత్తిడితో కూడిన క్షణాలు కూడా సరదాగా మారిపోయేవి. రింకూ సింగ్ ఇంగ్లీష్ మాట్లాడటానికి ప్రయత్నించినప్పుడు, తిలక్ వర్మ తన హైదరాబాదీ యాసలో మాట్లాడినప్పుడు అందరం నవ్వు ఆపుకోలేకపోయేవాళ్లం. ఇలాంటివే ఒక జట్టును మైదానం బయట కూడా బలంగా కలిపి ఉంచుతాయి" అని సూర్య వివరించాడు.