మహిళా దినోత్సవం వేళ తల్లికి అల్లు అర్జున్ ఖరీదైన కానుక

అంతర్జాతీయ మహిళా దినోత్సవం సందర్భంగా టాలీవుడ్ ఐకాన్ స్టార్ అల్లు అర్జున్ తన మాతృమూర్తి అల్లు నిర్మలకు ఎంతో విలువైన కానుకను అందించారు. ఈ ప్రత్యేకమైన రోజున ఆమెకు బ్రాండ్ న్యూ లెక్సస్ కారును బహుమతిగా ఇచ్చి సర్ ప్రైజ్ చేశారు.

అమ్మపై తనకున్న ప్రేమను, కృతజ్ఞతా భావాన్ని బన్నీ ఈ విధంగా చాటుకున్నారు. మన జీవితంలో ఉన్నత స్థాయికి చేరుకోవడానికి నిరంతరం శ్రమించే తల్లులకు మహిళా దినోత్సవం రోజున ఏదైనా ప్రత్యేకంగా చేయాలని చాలామంది భావిస్తుంటారు. అందులో భాగంగానే అల్లు అర్జున్ తన తల్లి పట్ల ఉన్న అపారమైన గౌరవానికి ప్రతీకగా ఈ లెక్సస్ కారును బహూకరించారు.

కొడుకు ఇచ్చిన ఈ ఊహించని బహుమతితో అల్లు నిర్మల ముఖంలో సంతోషం వెల్లివిరిసింది. మాతృమూర్తికి అల్లు అర్జున్ ఇచ్చిన ఈ ఖరీదైన బహుమతికి సంబంధించిన వార్త ఇప్పుడు సోషల్ మీడియాలో వైరల్ గా మారింది. బన్నీ కొన్ని రోజుల కిందటే తన అర్ధాంగి స్నేహారెడ్డికి విలాసవంతమైన మెర్సిడెస్ బెంజ్ కారును బహూకరించడం తెలిసిందే. 

సినిమా షూటింగ్‌లతో ఎంత బిజీగా ఉన్నప్పటికీ, కుటుంబానికి సమయం కేటాయించడంలో బన్నీ ఎప్పుడూ ముందుంటారు. ముఖ్యంగా ప్రత్యేకమైన రోజుల్లో కుటుంబ సభ్యులతో కలిసి వేడుకలు జరుపుకోవడానికి ఆయన ప్రాధాన్యత ఇస్తుంటారు. తాజాగా అమ్మపై ఐకాన్ స్టార్ చూపించిన ఈ ప్రేమను చూసి నెటిజన్లు, అభిమానులు ఆయనపై ప్రశంసల వర్షం కురిపిస్తున్నారు. ఉమెన్స్ డే రోజున తల్లికి ఇంతకంటే మంచి బహుమతి ఏముంటుందని కామెంట్లు పెడుతున్నారు.