ఓ ఇంటివాడు కాబోతున్న టాలీవుడ్ హీరో బెల్లంకొండ శ్రీనివాస్ ... అమ్మాయిది హైదరాబాదే!

టాలీవుడ్ యంగ్ హీరో బెల్లంకొండ సాయి శ్రీనివాస్ ఓ ఇంటివాడు కాబోతున్నారు. ఆయన తన బ్యాచిలర్ జీవితానికి ముగింపు పలుకనున్నారు. హైదరాబాద్‌కు చెందిన కావ్య రెడ్డి అనే యువతితో జీవితం పంచుకోనున్నారు.

ఇరువురి కుటుంబ సభ్యులు, అత్యంత సన్నిహితుల మధ్య ఓ ప్రైవేట్ కార్యక్రమం జరిగింది. దర్శకుడు బోయపాటి శ్రీను, హీరోయిన్ సంయుక్తా మీనన్ హాజరై కాబోయే జంటను ఆశీర్వదించారు. వీరితో పాటు అనిల్ రావిపూడి, విజయ్ కనకమేడల వంటి దర్శకులు, నిర్మాతలు కూడా ఈ ప్రైవేట్ వేడుకలో పాల్గొన్నట్టు తెలుస్తోంది. ఇందుకు సంబంధించిన వీడియోలు ప్రస్తుతం సోషల్ మీడియాలో వైరల్ అవుతున్నాయి.

ఇక కాబోయే వధువు కావ్య రెడ్డి వివరాల కోసం నెటిజన్లు ఆరా తీస్తున్నారు. ఆమె సినీ రంగానికి చెందిన వారు కాదు. కావ్య హైదరాబాద్‌లోనే ఉన్నత విద్యావంతుల కుటుంబానికి చెందిన అమ్మాయి. ఆమె తాతయ్య జడ్జిగా, తండ్రి న్యాయవాదిగా పనిచేస్తున్నారని ప్రచారం జరుగుతోంది. అయితే ఈ విషయంపై బెల్లంకొండ కుటుంబం నుంచి అధికారిక ప్రకటన రావాల్సి ఉంది.

'అల్లుడు శీను' చిత్రంతో హీరోగా పరిచయమైన శ్రీనివాస్, 'రాక్షసుడు' వంటి విజయాలతో గుర్తింపు పొందారు. ఇటీవల 'కిష్కింధపురి' సినిమాతో మంచి హిట్ అందుకున్నారు. ప్రస్తుతం ఆయన 'హైందవ', 'టైసన్ నాయుడు' చిత్రాల్లో నటిస్తూ బిజీగా ఉన్నారు. త్వరలోనే వీరి వివాహ తేదీపై అధికారిక ప్రకటన వెలువడుతుందని అభిమానులు ఎదురుచూస్తున్నారు.